Úndilik «Álem jigiti» 100-ge toldy
1952 jyly «álem jigiti» ataǵyn jeńip alǵan úndilik bodıbılder Manohar Aıch jýyrda óziniń júz jyldyq mereıtoıyn atap ótti. Bul týraly sheteldik BAQ-tarǵa silteme jasap, Ýtro.rý saıty málimdedi.
Boıynyń kishkentaılyǵyna baılanysty «qalta Gerkýlesi» atanyp ketken mereıtoı ıesi qazir Úndistannyń Kalkýtta qalasynda turady. Sportshynyń aıtýynsha, munsha jasqa kelýine birden-bir sebep - salaýatty ómir saltyn saqtaýy jáne ómiri taýsylmaıtyn optımızmi eken. «Men eshqashan ómirime óksigen emespin, kishkentaı kezimnen bir úzim nanym úshin aýyr jumystarǵa jegildim, alaıda bolashaqqa degen senimime esh selkeý túsirmedim» - deıdi júz jastaǵy qarııa.
Aıch sportpen 1942 jyly Brıtan basqynshylarynyń úkimeti basqaratyn patshalyq áýe qorǵanys kúshterine áskerı qyzmetke alynǵan soń aınalysa bastaǵan. Alaıda brıtan úkimetine qarsy sherýge shyqqan jas ushqyshty bılik túrmege toǵytady. Ol túrmede jatyp kúnine 12 saǵattap sporttyń aýyr túrlerimen shuǵyldanady. Onyń mundaı birbetkeıligine tánti bolǵan túrme basshylyǵy tipti bulshyqetterdi jetildiretin arnaıy dıetaǵa otyrýyna jaǵdaı jasap beredi.
1950 jyly Aıch túrmeden shyqqan soń, «Mıster Gerkýles» degen saıysqa qatysyp, jeńiske jetedi. Osydan keıin Londonda ótken «Álem jigiti» jarysyna qatysyp, 1952 jyly atalmysh ataqty jeńip alady.
Sodan beri úndi sportshysy kóptegen jarystarda top jaryp, kóptegen ataqtarǵa ıe boldy. Qazir júz jasaǵan qarııa ulynyń fıtness-klýbyn júrgizýge kómektesip, anda-sanda ózi de temir-tersek kóterip qoıatyn kórinedi.
Bir ǵasyrlyq ómirinde kópti kórgen «Álem jigiti» osy ataqtyń taǵy bir ıegeri - Arnold Shvartseneggermen kezdesýdiń bir sáti túspeı-aq qoıǵanyna ǵana ókinetinin jetkizgen.
