Úndi kompanııasy ShQO Buqtyrma sý qoımasy arqyly kópir salýǵa daıyn
ÓSKEMEN. QazAqparat - Úndistannan kelgen ınvestorlar Shyǵys Qazaqstannyń Kúrshim aýdanyndaǵy Buqtyrma sý qoımasyna kópir salýǵa ynta bildirdi.
Memlekettik-jekeshelik áriptestik negizinde «Shapoorji Pallonji Kazakhstan» kompanııasy jobaǵa qarajat salýǵa ázir ekendikterin jetkizdi, dep habarlaıdy óńir basshysynyń resmı saıty .
Ekijaqty yntymaqtastyq máselesin ShQO ákimi Danıal Ahmetov pen kompanııa dırektory Goýdhama Býdhar Ramamýrtı talqylady. «Shapoorji Pallonji Kazakhstan» álemdik naryqtaǵy tájirıbesi mol kásiporyn, búginde alpysqa jýyq elmen seriktestik ornatqan.
Aıta ketý kerek, óńir úshin mańyzdy kópirdiń jobalyq-smetalyq qujaty daıyn. Jalpy quny 37,4 mlrd teńgeni quraıdy. Investorlardan bólek memleket te atalǵan jobaǵa qarjy quıýǵa daıyn.
- Ásirese, densaýlyq saqtaý salasynda úlken tájirıbelerińizdiń bary qýantady. Qoldaǵy keıbir jobalar boıynsha qajetti qujattar daıyn, tanysýlaryńyzǵa bolady. Sharttary qanaǵattandyrsa, elimizdiń zańyna sáıkes jumys istep, jobany júzege asyrýǵa kiriseıik, - dedi Danıal Ahmetov.
Kezdesý sońynda ShQO ákimdigi men «Shapoorji Pallonji Kazakhstan» kompanııasy arasynda ózara yntymaqtastyq týraly memorandýmǵa qol qoıyldy. Onyń negizinde Óskemende Vınogradov kóshesi men Semeı tas joly aralyǵyn Ertis arqyly jalǵaıtyn taǵy bir kópir men óńirdiń iri eki qalasynda aýrýhana salý kózdelip otyr.
