Úndi kınosynyń juldyzdary koronavırýs juqtyrdy
MÝMBAI. EURONEWS - QazAqparat – Úndistanda koronavırýs órship, qoǵamnyń túrli tobyna taralyp jatyr, dep habarlaıdy QazAqparat Euronews-ke silteme jasap.
Senbi kúni Bollıvýd juldyzy, úndi kınosy tarıhyndaǵy eń tanymal akterlerdiń biri Amıtabh Bachchannan COVID-19 tabyldy. Keıinirek onyń uly – akter jáne prodıýser Abhıshek Bachchan koronavırýsqa jasaǵan testi oń nátıje bergenin habarlady.
Jeksenbi kúni onyń kelini – fotomodel jáne aktrısa Aıshvarııa Raı men 8 jasar nemeresiniń aýrý juqtyryp alǵany belgili boldy. Olardyń barlyǵy Mýmbaı aýrýhanasyna jatqyzyldy.
Kınojuldyz tabynýshylary súıikti akterleriniń aýrý juqtyryp alǵanyna tańǵaldy.
Radjesh Kedar, rıkshı júrgizýshi: «Koronavırýs Mýmbaıda óte tez taralyp jatyr, tipti Amıtabh Bachchan da juqtyryp aldy».
Abdýl Raýff, Amıtabh Bachchannyń tabynýshysy: «Onyń fılmderin birneshe urpaq boıy tamashalap kelemiz – meniń atama, ákeme jáne maǵan onyń fılmderi unaıdy».
Úndistan aýrý juqtyrý boıynsha úshinshi orynda – ol jaqta 850 myńnan astam adam COVID-19-ǵa shaldyqqan. Sońǵy kúnderi koronavırýstyń taralýy rekordtyq kórsetkishke jetken – bir táýlikte 29 myń adamnan anyqtalǵan. Qurbandar sany 23 myńǵa jaqyndady. Sarapshylardyń aıtýynsha, epıdemııa áli óz shyńyna jetpegen.
