Úndi kınokompanııasy Almatyda kıno túsiredi
ASTANA. QazAqparat - Sháken Aımanov atyndaǵy «Qazaqfılm» AQ úndiniń «Khushi Motion Pictures» atty kompanııasymen yntymaqtastyq týraly kelisim shartqa qol qoıdy, dep habarlaıdy QR Mádenıet jáne sport mınıstrliginiń baspasóz qyzmeti.
Birlesken óndiris jónindegi kelisim boıynsha, eki jaq «Love you family» tolyqmetrajdy kórkem fılminiń dıstrıbýtsııasy salasynda qyzmet etýge mindetteledi.
- Birlesip fılm shyǵarý boıynsha kelisim shart - úndi kınematografııasymen yntymaqtastyq jolynda jasalǵan mańyzdy qadam. Fılmniń túsirý toby Qazaqstanda alty kún jumys isteıdi. Úndistannan kelgen áriptesterimizge biz jan-jaqty kómek kórsetýge daıynbyz. Jalpy, kınostýdııa sheteldiń kınokompanııalarymen seriktestik qarym-qatynastaryn nyǵaıtýda jumystar atqaryp jatyr, - dedi Sh.Aımanov atyndaǵy «Qazaqfılm» AQ vıtse-prezıdenti Serik Jubandyqov.
Úndi rejısseri Sachındr Sharm túsirip jatqan «Love you family» fılminiń túsirý jumystary Úndistanda jáne Taılandta ótti. Kartınanyń qorytyndy túsirilimderi Almaty qalasynda júrgiziledi. Kórkem fılmde Djoshı Manoı Navanet, Pardasanı Aksha Sýnıl, Salman ıÝsýf Khan, Shaktı Kapýr, Navnı Parıhar esimdi úndi eliniń tanymal akterleri oınaıdy. Sonymen qatar atalǵan fılmde elimizdiń tanymal akteri Farhat Ábdiraıymov basshynyń rólin somdaıtyn bolady.
- Bul kartınada men túsetin kúnder tórteý ǵana. Rólim óte qyzyq, kúlkili bolatyn sııaqty. Jalpy men Anglııa, Reseı, Ózbekstan, Qyrǵyzstan syndy kóptegen elderdiń fılmderine tústim. Túsingenim, túsirilim jumystary barlyq elde birdeı ótedi eken. Bizdiń kınematografısterden esh aıyrmashylyǵy joq,- dedi akter Farhat Ábdiraıymov.
«Love you family» fılminde óziniń súıiktisi Radjben kezdesýge ata-anasy qarsy bolǵan Hýshı Devanı esimdi úndilik boıjetkenniń ómiri baıandalady. Qos ǵashyq úlkenderdiń batasyn almaı, nekelerin qıdyrady. «Úılený ońaı, úı bolý qıyn» demekshi, ýaqyt óte kele jan kúızelisi men turmystyq qıyndyqtan qajyǵan bas keıipker Qazaqstannan jańa jumys taýyp, birjola kóship ketedi. Eńbekqorlyǵynyń nátıjesinde jergilikti kompanııanyń birinde basshylyq qyzmetke deıin kóteriledi.
Sonymen qatar, «Qazaqfılm» AQ memlekettik-jekemenshik seriktestik baǵdarlamasy boıynsha eki birdeı birlesken jobany júzege asyryp otyr. Olar, Qazaqstan men AQSh arasyndaǵy jańa formattaǵy birlesken eń birinshi joba «Ámire» fılmi jáne qytaılyq kınematografıstermen júzege asyrǵaly otyrǵan qytaı halqynyń kompozıtory Sı Sınhaıdyń ómiri men shyǵarmashylyǵy týraly «Kompozıtor» kórkem fılmi bolmaq.
