Úndi ınvestorlary Almatyda bıznes júrgizýge nıetti
ALMATY. QazAqparat - Almaty ákimi Baýyrjan Baıbek Qazaqstandaǵy Úndistan Elshisi Prabhat Kýmarmen kezdesti, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasap.
Taraptar saýda- ekonomıkalyq jáne mádenı-gýmanıtarlyq yntymaqtastyqty nyǵaıtý máselelerin talqylady.
Almaty ákimi Qazaqstannyń Ortalyq Azııa elderi ishinde Úndistannyń iri saýda jáne ınvestıtsııalyq seriktesine aınalǵanyn atap ótti.
Óıtkeni, Úndistan ІT qyzmetinde iri eksporterlerdiń biri bolyp tabylady. Onyń ústine Almaty úndilikterdiń ınnovatsııalyq habtardy damytý tájirıbesin úırenýge jáne yntymaqtastyqty ornatýǵa nıetti.
Óz kezeginde Úndistan Elshisi týrızm, bilim men mádenıet salalarynda da yntymaqtastyqty nyǵaıtýdyń úlken áleýeti bar ekenin atap ótti.
«Almaty - óńirlik magnıt. Munda úndilik bıznesmenderdiń, mádenıet qaıratkerleriniń qatysýymen túri sharalar turaqty ótip keledi. Qala Delıden ushyp shyqqanda nebári 3,5 saǵattyq jerge ornalasqan. Sondyqtan men Almatynyń bizdiń azamattarymyz úshin tanymal týrıstik baǵytqa aınalatynyna senimdimin. Biz túrli festıvalder, kontsertter, kórmeler ótkizip, mádenı almasýdy odan ári jalǵastyramyz. Megapolıste Úndistannyń 600 stýdenti bilim alýda, men eki jaqty bilim baǵdarlamasynyń spektri arta túsetinine senimdimin», - dedi Prabhat Kýmar.
Kezdesý barysynda úndilik delegatsııaǵa «bir tereze» qaǵıdasy boıynsha ınvestorlarǵa qyzmet kórsetetin Ortalyqtyń, Indýstrıaldy aımaq pen «ITP» AEA-nyń áleýetteri kórsetildi.
Búginde qalada úndi kapıtalymen saýda, medıtsına, qurylys, qarjy jáne basqa salalarda 152 kásiporyn jumys isteıdi. 2017 jyly Almaty qalasy men Úndistan arasyndaǵy taýar aınalymy 186,6 mln AQSh dollaryna jetti.
