Úndi dárisinen 65 bala qaıtys boldy - Ózbekstannyń joǵarǵy soty
Ózbekstan Joǵarǵy sotynyń málimetinshe, «Dok-1 Maks» preparaty týraly qylmystyq is boıynsha bekitilgen aıyptaý qorytyndysyna sáıkes, 65 bala qaıtys bolǵan.
Barlyǵy 21 aıyptalýshy – Quramax Medical úndi dárileriniń dıstrıbıýtory jáne ımporttaýshy kompanııanyń qyzmetkerleri, dárilik zattardy, medıtsınalyq maqsattaǵy buıymdar men medıtsınalyq tehnıkany saraptaý jáne standarttaý memlekettik ortalyǵynyń laýazymdy ókilderi sot aldynda jaýap beredi. Onyń ishinde Quramax Medical kompanııasyn basqarǵan Úndistannyń 51 jastaǵy týmasy jáne qamaýǵa alynǵanǵa deıin Ózbekstannyń farmatsevtıka salasyn damytý agenttigi men dári-dármekterdi saraptaý jáne standarttaý memlekettik ortalyǵyn bir mezgilde basqarǵan 41 jastaǵy S.K. bar.
Aıyptalýshylardy 184 (salyqtardy nemese alymdardy tóleýden jaltarý), 186 (sapasyz ne jalǵan dárilik zattardy nemese medıtsınalyq maqsattaǵy buıymdardy ótkizý nemese ótkizý maqsatynda óndirý, daıyndaý, satyp alý, saqtaý, tasymaldaý, dárilik zattardy nemese medıtsınalyq maqsattaǵy buıymdardy dárihanalardan jáne olardyń fılıaldarynan tys jerde ótkizý, sondaı-aq bólshek saýdada ótkizý tártibin buzý), 205 (bılikti nemese laýazymdyq ókilettikterdi teris paıdalaný), 207 (laýazymdyq nemquraılylyq), 209 (laýazymdyq jalǵandyq), 210 (para alý), 211 (para berý), 212 (para berý deldaldyǵy) jáne 228 (qujattardy, mórlerdi, blankilerdi daıyndaý, qoldan jasaý, olardy ótkizý nemese paıdalaný) baptary boıynsha sottaıdy.
Eske salsaq, 27 jeltoqsanda Ózbekstan Densaýlyq saqtaý mınıstrligi «Dok-1 Maks» preparatyn qabyldaǵan 18 balanyń kóz jumǵanyn rastaıtyn tekserý nátıjesin jarııalady.
Ózbekstannyń Memlekettik qaýipsizdik qyzmeti (MQQ) 18 balanyń tumaýǵa qarsy úndi dárisinen keıin kóz jumý oqıǵasyna qatysty qylmystyq is qozǵady.
Al, Qazaqstan bıligi bul dáriniń elde tirkelmegenin jáne satylymda joq ekenin habarlady.
Aıta ketsek, jýyrda Dúnıejúzilik densaýlyq saqtaý uıymy sýyq tııý men allergııaǵa qarsy qoldanylatyn NATURCOLD preparatynyń qaýiptiligi týraly eskertti.
«Buqaralyq aqparat quraldarynda Úndistannyń Densaýlyq saqtaý mınıstrligi jótelge qarsy sırop shyǵaratyn Riemann Labs farmatsevtıkalyq kompanııasynyń qyzmetine tyıym salǵany týraly aqparat tarady. Kamerýndaǵy balalar osy sıroptyń saldarynan qaıtys bolýy múmkin dep kúdiktenedi. Kompanııanyń lıtsenzııa nómiri NATURCOLD preparatynyń qaptamasyndaǵy lıtsenzııa nómirine sáıkes keledi. Aıta keteıik, NATURCOLD Qazaqstan Respýblıkasynda tirkelmegen, sondaı-aq kóterme jáne bólshek saýda segmentinde satylmaıdy», - delingen QR Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıteti aqparatynda.
