«Úndestik sabaqtary» fılmin álemdik prokatqa shyǵarýmen Films dictributiom agenttigi aınalysatyn boldy
ALMATY. 8 aqpan. QazAqparat - Keshe Germanııada 63-shi Berlın kınofestıvali óz jumysyn bastady. Onda bıyl qazaq kınematografııasy tarıhynda tuńǵysh ret Sháken Aımanov atyndaǵy «Qazaqfılm» kınostýdııasy shyǵarǵan Ámir Baıǵazınniń «Úndestik sabaqtary» («Ýrokı garmonıı») atty alǵashqy kınotýyndysy festıvaldiń negizgi baıqaýyna qatysqaly otyr.
«Qazaqfılm» kınostýdııasynyń baspasóz qyzmetiniń habarlaýynsha, fılmniń prodıýseri Anna Kachkonyń sózine qaraǵanda 14 aqpanda «Úndestik sabaqtarynyń» BAQ ókilderine arnalǵan jabyq kórsetilimi jáne festıvalge aldyn-ala tirkelgen jýrnalıstermen baspasóz otyrysy ótedi. Al kúnniń ekinshi jartysynda Berlınale ortalyq saraıynda (Berlinale Palast) fılmniń alǵashqy kórsetilimi bolady. Sondaı-aq endi kóptegen elderdiń fılmderimen jumys jasaýda tájirbıesi bar jáne osy salada barlyq quqyqtardy jaqsy biletin Frantsııanyń Films dictributiom agenttigi «Úndestik sabaqtary» fılmin álemdik prokatqa shyǵarýmen aınalysatyn bolady. 2012 jyly Films dictributiom kompanııasy usynǵan «WAR WITCH» fılmi Berlın kınofestıvalinde «Eń úzdik áıel róli» júldesine qol jetkizip, «Oskar 2013» kınojúldesine úmitkerlerdiń tiziminen kóringen bolatyn.
Jalpy 28 jastaǵy rejısseri Ámir Baıǵazınniń «Úndestik sabaqtary» jobasy 2011 jyly VII Halyqaralyq «Eýrazııa» kınofestıvali sheńberinde ótkizilgen «Qazaqstandyq kınojobalar naryǵynda» úzdik dep tanyldy. Sonymen qatar «Qazaqfılm» kınostýdııasynyń qarjylaı qoldaýyna jáne halyqaralyq deńgeıde tanylýyna keń múmkindik aldy. Fılmniń túsirý jumystary 2012 jyldyń shilde aıynda aıaqtaldy. Birneshe kúnnen keıin fılmniń alǵashqy kadrlary Bosnııa jáne Gertsegovınanyń Saraevo qalasynda ótken Halyqaralyq kınofestıvalde kórsetilip, «Work-in-Progress» konkýrstyq baǵdarlamasynda bas júldeni jeńip aldy. Kóp uzamaı, «Berlınale álemdik kıno qory» taǵaıyndaǵan júldege qol jetkizdi. Jalpy, bul fılm - atalmysh qordyń qoldaýyna ıe bolǵan alǵashqy qazaqstandyq joba bolyp otyr.
