Úndi muhıtyndaǵy qaıyq apatynan keıin 250 mıgrant iz-túzsiz joǵalyp ketti
ASTANA. KAZINFORM – Úndi muhıtynyń Andaman teńizi aýmaǵynda mıgranttar mingen qaıyqtyń apatqa ushyraýynan shamamen 250 adam, onyń ishinde balalar da iz-túzsiz joǵaldy, dep habarlaıdy BBC.
BUU-nyń Bosqyndar isi jónindegi Joǵarǵy komıssary basqarmasy men Halyqaralyq kóshi-qon uıymynyń málimetine súıensek, iz-túzsiz joǵalǵandardyń qatarynda rohındja musylmandary men Bangladesh azamattary bar. Aldyn ala derek boıynsha, traýler Bangladeshten shyǵyp, Malaızııaǵa bet alǵan. Qatty jel, bıik tolqyn jáne qaıyqtyń shamadan tys júktelýi saldarynan ol aýdarylyp ketken.
Málimetke sáıkes, Bangladesh kemesi toǵyz adamdy qutqaryp qalǵan. Jaǵalaý kúzetiniń habarlaýynsha, aman qalǵandar sýǵa batpaý úshin bóshkeler men aǵash synyqtaryna jarmasyp turǵan.
Mıgranttardyń basym bóligi rohındja etnıkalyq tobyna jatady. 2017 jyly Mıanma aýmaǵynda narazylyqtardy kúshpen basý operatsııasy bastalǵaly beri júzdegen myń adam elden ketýge májbúr boldy.
Bosqyndar lagerlerindegi aýyr jaǵdaı kóptegen rohındja ókilderin Malaızııaǵa jetýdiń jańa ári qaýipti joldaryn izdeýge ıtermelep otyr. Olar bul eldi ómir súrýge qaýipsiz oryn retinde qarastyrady.
Jaǵalaý kúzeti ókiliniń aıtýynsha, aman qalǵandar saparǵa «jaqsy ómirge degen úmitpen» shyqqandaryn aıtqan.
Buǵan deıin Lampedýza araly mańynan mıgranttar mingen qaıyq tabylyp, keminde 19 adamnyń qaza tapqany habarlanǵan.
