Un baǵasy bir jyl ishinde 45 paıyzǵa qymbattady

ASTANA. QazAqparat – Elimizde unnyń bólshek saýdadaǵy baǵasy jyl ishinde birden 45 paıyzǵa jýyq qymbattap ketti, dep habarlaıdy QazAqparat tilshisi.

Energyprom.kz dereginshe, osy jyldyń qańtar-qyrkúıeginde elimizde 2,3 mln tonna un óndirildi.

Óndiristiń jartysynan kóbi Qostanaı (784,1 myń tonna) men Soltústik Qazaqstan (243,7 myń tonna) oblystaryna, sonymen qatar Shymkent qalasyna (197,6 myń tonna) tıesili.

Elimizdiń un tartatyn kásiporyndary ishki naryqty ónimmen tolyqtaı qamtamasyz etip otyr.

Sonymen qatar qańtar-tamyz aralyǵynda olar un eksportyn 28,3 paıyzǵa arttyryp, 1,1 mln tonnaǵa jetkizdi.

Alaıda, ishki naryqta un satý birden 22,2 paıyzǵa, 838,8 myń tonnaǵa deıin qysqaryp otyr. Al ótken jyly 3,6 paıyz ósim baıqalǵan edi.

Ótken jylmen salystyrǵanda osy jyldyń qańtar-tamyzdynda bıdaı nemese bıdaı-qarabıdaı unynyń eksporttyq baǵasy birden 41,6 paıyzǵa qymbattap ketti.

2022 jyldyń qazan aıynyń qorytyndysynda ishki naryqta tutynýshylarǵa arnalǵan unnyń baǵasy jyl basynan beri 41,3 paıyzǵa jáne 2021 jyldyń qazanymen salystyrǵanda 44,3 paıyzǵa qymbattady.

2022 jyldyń qazan aıynda joǵary surypty bıdaı unynyń bólshek saýdadaǵy baǵasy 1 kelisi úshin 369 teńgeni, birinshi surypty ún 245 teńgeni qurady.

Qazaqstan qalalary arasynda joǵary surypty bıdaı unynyń eń qymbat Astanada (1 kelisi 447 teńge), Aqtaýda (411) jáne Shymkentte (406), al eń arzany Aqtóbede (279 teńge), Pavlodarda (292), Jezqazǵanda (296) jáne Semeıde (296) tirkelgen.

Birinshi surypty bıdaı unynyń bir kelisine eń joǵary baǵa Aqtaýda (335 teńge), Almatyda (306) jáne Astanada (298), eń tómeni Petropavlda (145 teńge), Qaraǵandyda (184) jáne Pavlodarda (186) belgilendi.

Foto ız otkrytyh ıstochnıkov