Umytylyp bara jatqan esimderimizdi jańǵyrtýǵa úles qossam deımin - Nazgúl Pahman
Onyń aıtýynsha, 2019 jyldyń Jastar jyly dep jarııalanyp, saltanatpen ashylýy stýdent-jastarǵa da erekshe lep berdi.
«Elbasymyzdyń bul bastamasy jastardyń boıyndaǵy jaýapkershilik pen erteńgi kúnge degen senimin arttyrady. Ata-babalarymyzdyń qasyq qanymen, zor eńbegimen kelgen azattyǵymyzdyń qadirin bilip, ulttyq qasıetterdi joǵaltpaı, óskeleń urpaqtyń sanasynda jańǵyrtý - bizdiń paryzymyz. Keleshekte táýelsizdigimizdi tuǵyrly etý úshin tynbaı eńbek etip, elimizdiń órkendeýi jolynda ter tógýimiz qajet. Qazaq eliniń ózge memlekettermen terezesi teń dárejede turýy úshin atqarylatyn jumys kóp, soǵan óz úlesimizdi qosatynymyzǵa senimdimin», - deıdi Nazgúl Ermekqyzy.
-Nazgúl, seni oblys kólemindegi sharalarǵa belsendi qatysatyn jas retinde jaqsy bilemiz. Ózińniń osyǵan deıin qol jetkizgen tabys-jetistikterińdi aldaǵy ýaqytta da molaıtýǵa kúsh salatyn shyǵarsyń ?
«Iá, qoldan kelgenshe, alda júrgenge ne jetsin! Ózim úshin 2018 jyl jeńisti de jemisti jyl boldy desem, qatelese qoımaspyn. Belgili ánshi-kompozıtor Donedil Qajymovtyń ánderin oryndaýshylardyń V respýblıkalyq «Aq Jaıyq - arý mekenim» án festıvaliniń dıplomanty atanyp, Qazaqstannyń halyq jazýshysy, Memlekettik syılyqtyń ıegeri, aqyn Farıza Ońǵarsynovanyń shyǵarmashylyǵyna arnalǵan respýblıkalyq kórkemsóz oqý sheberleri baıqaýynda birinshi orynǵa ıe boldym. Sondaı-aq Qazaqstan Respýblıkasynyń tuńǵysh Prezıdenti - Elbasy kitaphanasynda ótken «Rýhanı jańǵyrý: bolashaqqa bastar jol» atty semınar-trenıngke qatysyp, óz bilim-biligimdi tolyqtyrdym.
Osyndaı sharalardyń arqasynda elimizdiń erteńi bizdiń qolymyzda ekendigine kózim jete tústi. Endi Jastar jylynan da kútetin úmitim kóp. Ulttyq qundylyqtarymyzdy qasterleý, umytylyp bara jatqan esimderdi jańǵyrtý baǵytynda uıymdastyrylatyn sharalardyń basy-qasynan tabylyp, belsene atsalyssam ba deımin», - dedi Nazgúl Pahman.
