«Umytylǵan ulttyq taǵamdar» jobasy tanystyryldy
NUR-SULTAN. QazAqparat - Elordada «Umytylǵan ulttyq taǵamdar» jobasy tanystyryldy, dep habarlaıdy QazAqparat qala ákimdigine silteme jasap.
Qazaqtyń umyt qalǵan ulttyq taǵamdaryn qaıtadan jańǵyrtý maqsatynda Dostyq úıinde «Rýhanı jańǵyrý - ulttyq qundylyqtardy jańǵyrtý men biregeılikti saqtaýdyń negizi» taqyrybynda dóńgelek ústel ótti,
Sharaǵa bilim salasynyń jetekshileri, «Atameken» ulttyq kásipkerlikti damytý palatasynyń ókilderi, jalpy bilim beretin oqý oryndarynyń dırektorlary, tehnıkalyq jáne kásiptik bilim berý oqý oryndarynyń basshylary, ulttyq taǵamdy zertteýshiler men etnograf mamandar, meıramhana isiniń mamandary, stýdentter qatysty.
Shara barysynda Nur-Sultan qalasy ákimdiginiń Qoǵamdyq tamaqtandyrý jáne servıs kolledji jáne qalalyq Bilim basqarmasyna qarasty №28, 30, 55 mektepter birlesip daıyndaǵan «Umytylǵan ulttyq taǵamdar» jobasy tanystyryldy.
Basqosýda mamandar qazaqtyń umyt bolǵan taǵamdarynyń birqataryn atap, olardy qaıta jańǵyrtýdyń qajettiligine toqtaldy. Tek tabaq tartýdyń astarynda úlken maǵyna bar ekendigi aıtyldy. Bul kúnde kejim tabaq, tóre tabaq, bas tabaq, aıaq tabaq, qos tabaq, syı tabaq syndy tabaq tartý dástúriniń keıbiri umytylyp bara jatqanyn jetkizdi.
