Umytyla bastaǵan «shopandar kúni» Almaty oblysynda atap ótildi

Bul ıgi iske jergilikti Jaıylym komıteti men aýyldaǵy mal sharashylyǵymen aınalysatyndar muryndyq bolǵan.

Atalǵan aýyldyń ákimi Beısenbek Aınabekovtyń aıtýynsha, bul aýylda shopandar kúni sońǵy ret 1989 jyly atap ótilipti. «Keńes ókimeti tarardyń aldynda aýylymyzda jalpy mal basynyń sany 35 myń edi. Odan keıin halyqtyń kóbi qalaǵa aǵylyp, eshkimniń mal sharýashylyǵymen aınalysýǵa jóndi mán bermegendiginen mal basy azaıǵan edi. Degenmen, qazirgi kúni mal sharýashylyǵy qaıta kóterilip, mal sany 30 myńǵa jetip otyr», -deıdi ákim.

Aıtýly mereke barysynda kıiz úı tigilip, dastarhan jaıylyp, kókpar tartylyp, báıge ótti. Sondaı-aq aýyldyń jastary án salyp, bı bılep óz ónerlerin ortaǵa salsa, aýyl ákimi aýyl sharýashylyǵymen aınalysyp, aýyldyń órkendeýine úles qosyp jatqan bir qatar azamattarǵa quttyqtap, maqtaý qaǵazdaryn berdi.

Osy tusta Qazaqstandaǵy BUU Damý baǵdarlamasy men QR Aýyl sharýashylyq mınıstrliginiń birikken "Aýyl turǵyndarynyń jaǵdaıyn kóterý jáne ekologııalyq tutastyqty saqtaýǵa arnalǵan turaqty túrde jaıylym resýrstaryn basqarý" jobasynyń qyzmetkerleri bul bastamany qoldap, mal sharýashylyǵyn jandandyryp, eńbek etip júrgenderdi marapattady. Atalǵan baǵdarlamanyń qoǵammen baılanys boıynsha sarapshysy Baǵlan Kúlimbaeva óz jobalary aıasynda osy aýylǵa 10 kıiz úı, kún sáýlesimen isteıtin elektr qurylǵysyn jáne medıtsınalyq qorapsha tabystaǵandyǵyn aıtady.

Almaty qalasynan 178 shaqyrym qashyqtyqta ornalasqan bul aýyl mal sharýashylyǵyna óte tıimdi. Jaıylymdyq jeri keń ári sýdan da esh qıyndyq kórmeıdi.