Úmit óte az – Tótenshe jaǵdaılar mınıstri jer astynda qalǵan kenshiler týraly

Tótenshe jaǵdaılar mınıstri Syrym Sháriphanov shahtadaǵy jaǵdaı týraly Óńirlik kommýnıkatsııalar qyzmetinde ótken brıfıngide jer astynda qalǵan kenshilerdi qutqarý múmkindigi óte az ekenin aıtty, dep habarlaıdy Kazinform tilshisi.

Qazirgi ýaqytta Kostenko shahtasynyń 13 kenshisi áli de jer astynda. Olar iz-túzsiz joǵaldy dep sanalady jáne mınıstrdiń aıtýynsha, olardy tiri tabý ekitalaı.

«Ózin-ózi qutqarý ýaqyty tek bir saǵatqa sozylady. Odan kóp ýaqytqa shydamaýy múmkin. Sondyqtan qutqarý múmkindigi óte az. Biraq biz úmit úzbeımiz», – dedi S. Sháriphanov.

Kásibı áskerılendirilgen apattyq-qutqarý qyzmetteriniń Respýblıkalyq ortalyq shtaby Qaraǵandy fılıalynyń dırektory Gennadıı Sılınskııdiń aıtýynsha, bastapqyda shahtada 48K3 Batys lavasynda 42 jáne 45 sektsııalar arasyndaǵy qazba bekitkishteriniń artynda órt tutandy.

Barlyǵy 149 sektsııa boldy. Kásibı áskerılendirilgen apattyq-qutqarý qyzmeti shaqyrylǵan, apatty joıý jospary engizilgen, adamdardy shahtalardan shyǵarý týraly habarlandyrý júrgizilgen. Alaıda 7-8 mınýttan keıin avarııalyq ýchaskede jarylys bolǵan.

«Jarylystyń kúshi sonshalyqty, batys jáne shyǵys bloktaryndaǵy telekommýnıkatsııa isten shyqty. Soqqy tolqyny 2 shaqyrymǵa sozylyp, tek apattyq aımaqty emes, shyǵys blokta ornalasqan K2 lavasyn da qamtydy. Osydan keıin shahtaǵa adamdardy izdeýge jiberilgen birinshi bólimshe jergilikti órt oshaqtary bar ekenin habarlady. Sondyqtan barlyq kúshter áli de qutqarylýy múmkin adamdardy izdeýge jumyldyryldy. Bizdiń fılıaldyń qutqarýshylary 5 adamdy shahtadan alyp shyqty. Olarǵa alǵashqy kómek kórsetilip, medıtsınalyq mekemege jetkizildi. Ókinishke oraı, qalǵan shahterlerge kómektese almadyq. Jergilikti órt oshaqtary oqshaýlandy. Qazir izdestirý jumystary jalǵasyp jatyr jáne shahtadaǵy gaz jaǵdaıyna monıtorıng júrgizilýde», - dep tolyqtyrdy Gennadıı Sılınskıı.

Eske salaıyq, búgin túnde Qaraǵandy oblysyndaǵy Kostenko atyndaǵy shahtada órt boldy. Saǵat 17.33-tegi málimet boıynsha 33 kenshiniń denesi tabyldy,13 adam izdestirilip jatyr. 20 jumysshy aýrýhanaǵa jetkizildi. 

Keshqurym brıfıng ótkizgen Tótenshe jaǵdaılar mınıstri Syrym Sháriphanov jer astynda qalǵan kenshilerdi tiri tabýǵa úmit óte az ekenin málim etti.

Kásibı áskerılendirilgen apattyq-qutqarý qyzmetteriniń respýblıkalyq ortalyq shtaby Qaraǵandy fılıaly dırektorynyń orynbasary Jumat Ókenov mert bolǵan kenshilerdiń jeke basyn anyqtaý qıynǵa túsip jatqanyn aıtty.

29 qazan Jalpyulttyq aza tutý kúni bolyp jarııalandy. Memleket basshysy Qasym-Jomart Toqaev Úkimetke «ArselorMıttalTemirtaý» kompanııasymen ınvestıtsııalyq yntymaqtastyqty toqtatý týraly tapsyrma berdi. Keıin Úkimettiń baspasóz qyzmeti «ArselorMıttal Temirtaý» AQ-nyń menshik quqyǵyn QR menshigine qaıtarý týraly kelisimsharttyń aıaqtalýǵa jaqyn ekenin málim etti.

Apatqa baılanysty Reseı, Belarýs, Qyrǵyzstan, Frantsııa, Ózbekstan prezıdentteri men Túrkııa Syrtqy ister mınıstrligi kóńil aıtty.