Ýmraǵa bıyl 100 myń adam barady
ASTANA. 22 shilde. QazAqparat - Ýmraǵa bıyl 100 myń adam barady, dep habarlaıdy Qazaqstan musylmandary dinı birlestiginiń resmı saıty.
«Arab news» agenttiginiń habarlaýynsha, qajylyq saparǵa berilgen ruqsatnamanyń 15 ramazanǵa (24 shildege deıin) uzartylýyna baılanysty Saýd Arabııaǵa taǵy 100 myń adam keledi dep kútilýde.
Qajylyq pen ýmranyń ekonomıkasyna jaýap beretin sheıh Ahmad Bafakıh ol týraly bylaı deıdi: «Saýd Arabııaǵa qajylyqqa kelip-ketip jatqan adamdardyń sanyn naqtylap, bosaǵan oryndarǵa qosymsha ruqsatnama ýaqytynyń uzartylýy men berilýi jaıly saýdııalyq úkimet durys sheshim qabyldady» delingen habarlamada.
«Qajylyq-ýmramen aınalysatyn basqa birlestikter bul sheshimge synı kózben qarady. Olar ýmrada júrgen adamdarǵa taǵy 100 myń adam kelip qosylsa, nebir qıynshylyqtardyń bolyp qalýynan qaýiptenip otyr», - dedi Bafakıh. Alaıda, qajylyq mınıstrligi óz málimdemesinde: «Qosymsha ruqsatnamalar adam sanyn teksergennen keıin berildi. 100 myń adam kelgenge deıin, sol ýaqytta oryndar bosap qalady», - dep sendirdi.
Ruqsatnamanyń kóptep berilýi Saýd Arabııa bıýdjetine kiristiń kóbeıýine ákeledi. Ýmra mezgiliniń bastalýymen Saýdııa bıýdjetine 17 mlrd. saýdııalyq rıal (1 dollar - 3,75 saýdııalyq rıal) kelip tústi. Qajylyqqa kelgen ár adam ortasha eseppen alǵanda, 3500 saýdııalyq rıal jumsaıdy eken. Bul aqsha dúken men ekskýrsııany sanamaǵanda jolǵa, kólikke, qonaqúıge, tamaqqa ketedi.
Óz kezeginde, Qajylyq mınıstrligi qajylyq kezindegi jaǵdaıdy qadaǵalaıtynyn habarlady. Eger de týrıstik operatorlar tarapynan qatelikter týyndap jatsa, qosymsha ruqsatnamalardyń berilýi toqtatylady.
