«Umraǵa aparamyn»: Shymkentte 245 adamdy aldaǵan týrıstik fırma basshysy sottaldy

Shymkentte halyqty qajylyq saparǵa alyp baramyn dep aldaǵan týrıstik fırma dırektory 6 jylǵa sottaldy, dep habarlaıdy QazAqparat tilshisi.

Shymkent qalasynyń qylmystyq ister jónindegi aýdanaralyq sotynda Qazaqstannan qajylyq saparǵa barmaq bolǵandardy aldaǵan «Kausar Travel» týrıstik fırmasynyń dırektoryna qatysty úkim shyqty.

Sottalýshy 245 adamdy Umra qajylyǵyna alyp barý úshin joldamalardy rásimdep bermek bolyp, olardan jalpy kólemi 255 mln teńgeden astam aqsha alǵan. Onyń kinási jábirlenýshilerdiń, kýágerlerdiń jaýaptarymen, zattaı aıǵaqtarmen jáne istegi basqa da materıaldarmen tolyq dáleldendi.

Sot úkimimen kompanııa dırektory alaıaqtyq jasady dep tanylyp, oǵan 6 jyl merzimge bas bostandyǵynan aıyrý jazasy taǵaıyndaldy. Sondaı-aq ol týrızm salasyndaǵy qyzmetpen aınalysý quqyǵynan 5 jyl merzimge aıyryldy. Jábirlenýshilerdiń 225 mln teńgeden astam somany óndirip alý týraly talap-aryzy da qanaǵattandyryldy.

«Qylmystyq kodekstiń 190-baby 3-bóliginiń sanktsııasynda 3 jyldan 7 jylǵa deıin bas bostandyǵynan aıyrý túrindegi jaza kózdelgen. Sot qylmystyq jaýapkershilikti jeńildetetin jáne aýyrlatatyn mán-jaılardyń anyqtalmaǵanyn, aıyptalýshy istegen is-áreketiniń aýyrlyǵyn sezinbegenin, ókinish bildirmegenin, qylmyspen keltirilgen materıaldyq zalaldyń orny tolmaǵanyn jáne jábirlenýshilerdiń qatań jaza taǵaıyndaý týraly pikirlerin eskerdi. Sot úkimi zańdy kúshine engen joq», – delingen Shymkent qalalyq sotynyń baspasóz qyzmeti taratqan aqparatta.