«Úmitkerlerdiń reıtıngisi qandaı?» - respýblıkalyq basylymdarǵa sholý
***
«Keshe tústen keıin Elbasy Nursultan Nazarbaev jumys saparymen Ońtústik Qazaqstan oblysyna keldi», - dep jazady «Egemen Qazaqstan» gazeti «Elbasyǵa óńirdegi órkendi ister kórsetildi» degen maqalasynda. Basylymnyń atap ótýinshe, Memleket basshysy ońtústik óńirde Ordabasy aýdany Badam aýylyndaǵy qus fabrıkasynda bolyp, kásiporyn jumysymen jáne oblystyń údemeli ındýstrııalyq-ınnovatsııalyq damý baǵdarlamasymen, sonymen qatar jańa perınataldyq ortalyqtyń jumys barysymen jete tanysyp, olardyń qyzmetkerlerimen tildesti.
Elimizdiń Táýelsizdiginiń 20 jyldyq mereıtoıyna oraı «Egemen Qazaqstan» gazetinde Parlament Májilisiniń depýtaty, «Nur Otan» HDP Saıası keńesiniń bıýro múshesi Nurtaı Sabılıanovtyń «Táýelsizdik bizge bárinen de qymbat» degen taqyryppen kólemdi maqalasy jarııalandy. Onda jeltoqsan oqıǵasynan bastap osy ýaqytqa deıin qol jetkizgen jetistikterimizge sholý jasalǵan. «Táýelsizdikke jetý joly qanshalyqty aýyr bolsa, táýelsizdikpen tynystaýdyń baıandylyǵy da sonshalyqty jaýapty ekeni anyq. Jas urpaq táýelsizdiktiń taǵylymdaryn tanyp, qasterlep, qurmettep otyrýy kerek. Táýelsizdik bizge bárinen de qymbat. Sondyqtan da bárimiz elimiz úshin eńbektenýimiz, halqymyz úshin qyzmet isteýimiz kerek», - dep oı aıtady maqalasynda avtor.
***
Saılaý - saıasatkerler men saıası uıymdardyń shynaıy reıtıngterin anyqtap, halyq arasynda qanshalyqty qoldaýǵa ıe ekendigin aıqyndaıtyn barometr. Qazirdiń ózinde saıasattanýshylar aldaǵy kezekten tys prezıdent saılaýy kezinde úmitkerlerdiń qansha daýys jınap, saıası reıtıngterin qandaı jolmen kóteretindikterin boljaýda. Al sol boljamdarmen jete tanysqyńyz kelse, «Aıqyn» gazetiniń búgingi sanyndaǵy «Úmitkerlerdiń reıtıngisi qandaı?» degen maqalaǵa kóz júgirtińiz. Máselen, basylymnyń atap ótýinshe, turǵyndardyń memlekettik organdar men azamattyq qoǵam ınstıtýttaryna degen senim reıtıngisi boıynsha Qazaqstan halqynyń tórtten úsh bóligi Prezıdentke qandaıda bir deńgeıde qoldaý bildiredi eken.
«Aıqyn» gazetiniń jazýynsha, tap qazirgi ýaqytta Qazaqstandaǵy qýat kóziniń tapshylyǵy 70-75 mVt shamasynda eken. Elimizdiń ońtústik óńiri, onyń ishinde basty megapolısimiz Almatynyń ózi elektr qýaty jaǵynan kúni búginge deıin qyrǵyz eline táýeldi bolyp otyr. «Bizdi bul tyǵyryqtan shyǵaratyn qazir qurylysy qarqyndy júrgizilip, el Táýelsizdiginiń 20 jyldyǵy qarsańynda, naqty aıtar bolsaq, ústimizdegi jyldyń 11 jeltoqsan kúni 11 saǵat 00 mınýtta iske qosylýy josparlanyp otyrǵan Moınaq sý elektr stansasy», - deıdi basylym. Maqala gazettiń juma kúngi nómirinde «Moınaq» múmkindikti arttyra túseri anyq» degen taqyryppen basylǵan.
***
«Qoldanystaǵy 1 myń 15 ruqsat berý qujatynyń 331 qysqarady. Sóıtip, kásipkerliktiń qaryshtaýyna tusaý bolatyn ákimshilik kederginiń bir parasy taǵy sylynady. Keshe Parlament Senatynda osy máseleni qamtıtyn zań jobasy birinshi oqylymda maquldandy», - dep jazady «Alash aınasy» gazeti. Basylymnyń atap ótýinshe, lıtsenzııalaý qyzmetteriniń 20 túri, sertıfıkattaýdyń 20 túriniń 5-eýi joıylady. Akkredıtteýdiń 8 túriniń 2-eýi ketip, 6-aýy qalady. Al ruqsat berýdiń 131 túriniń 44-i qysqarady. Qoldanystaǵy 184 kelisýdiń 134-i qysqaryp, ózge de 48 qujat qysqarady. Bul jaıynda gazettegi «Ruqsat berý qujattary 30 paıyzǵa qysqarady» degen maqaladan egjeı-tegjeıli bile alasyzdar.
«Bıylǵy ylǵal kóńildi toǵaıtady». «Alash aınasy» gazetiniń búgingi nómirinde osy taqyryppen jarııalanǵan maqala Úkimettiń keshegi selektorlyq otyrysyna arnalǵan. Kóktemgi egistik naýqanyna arnalǵan alqaly jıynda sóz alǵan Aýyl sharýashylyǵy mınıstri A.Kúrishbaevtyń aıtýynsha, bıyl respýblıka boıynsha jalpy egistik alqap 21,3 mln. gektardy quraıdy. Onyń 16,5 mln. gektary - dándi, 1,7 mln. gektary - maıly daqyldar. Bul rette dándi jemdik jáne dándi burshaqty daqyldardyń egistik alqaby 94 myń gektarǵa artpaq.
***
«Kazahstanskaıa pravda» gazetiniń jazýynsha, Prezıdenttik saılaýdy jazyp, kórsetý úshin elimizdiń Syrtqy ister mınıstrligine 100-den astam sheteldik BAQ tirkelgen. Onyń ishinde 70 sheteldik jýrnalıst akkredıtatsııa alyp úlgergen. Olardyń qatarynda Pervyı kanal (Reseı), AFP - (Frantsııa), «Asahı» (ıAponııa), sondaı-aq budan da basqa birqatar elderdiń telearnalary bar. Basylymnyń naqtylaı túsýinshe, birqatar sheteldik BAQ-tyń Qazaqstanda menshikti tilshileri de qonystanǵan. Sheteldik tilshiler elimizdiń óńirlerinde de jumys istemek. Al Prezıdenttik saılaýǵa 2-3 kún qalǵanda olar Astanaǵa jınalady.
