Úmit úıi: Týa bitti dertke shaldyqqan sábılerdiń kóbi saýyǵyp ketedi
AQTÓBE. QazAqparat - Aqtóbedegi «Úmit» sábıler úıinde 55 bala tárbıelenip jatyr. Týa bitti aýyr dertke shaldyqqan balalardyń kóbi emdelip, jazylady, dep habarlaıdy QazAqparat tilshisi.
Aqtóbedegi «Úmit» sábıler úıinde jańa týǵan balalar 3-4 jasqa deıin tárbıelenedi. Olardyń teń jartysyn ata-analary ýaqytsha senip tapsyrǵan. Kóbi densaýlyǵy syr bergen balalaryn memleket qamqorlyǵyna berip, emdetedi. Al jalǵyzbasty analar turmys jaǵdaılaryna baılanysty sábıler úıine balalaryn ýaqytsha qaldyrady. Aqtóbede turmysy tómen otbasynyń balalary da sábıler úıinde tárbıe alyp júr. Kóbi qazaq balasy.
«Sábıler úıinde 11 múgedek bala bar. Olardyń árqaısysynda múgedektigi týraly anyqtama alynyp, qarjy balalardyń arnaıy esepshotyna túsip jatyr. Sonymen qatar, 4 balaǵa múgedekter týraly anyqtama daıyndalýda. Barlyǵy 22 bala oblystyq balalar aýrýhanasynda, «Darý» ońaltý ortalyǵynda em aldy. Al eki bala Astanadaǵy Ana men bala ortalyǵynda em qabyldady. Koreıa elinen baryp, ota da jasaldy. Týa bitti aýrýǵa shaldyqqan balalardyń keıbiri otadan soń aıyǵyp ketip, qalypty ómirge aralasady. Jalpy dertke shaldyqqan balalardyń 30-40 paıyzy emdeledi. Júrek aýrýyna shaldyqqandarǵa Astana, Almatyda ota jasalady»,- dedi «Úmit» sábıler úıiniń bas dárigeri Qadyrǵalı Imanalın.
Al sábıler úıinde jatqan 4 jastaǵy qyz bala týa bitti sal aýrýyna shaldyqqan. 
Medbıke Gúlnar Bıjanova ony baǵady. Bala tamaǵyndaǵy tútikshe arqyly tynys alady. Sábıler úıindegi tósekke tańylǵan jalǵyz balany ata-anasy tastap ketken.
«Úmit» sábıler úıinde Aqtóbe oblystyq densaýlyq saqtaý basqarmasynyń tapsyrmasymen «Nadejda» toby ashyldy. Onda birinshi sábıin dúnıege ákelgen jalǵyzbasty analar men jazasyn óteýshilerdiń balalary ýaqytsha qabyldanady. Jetimder sanyn azaıtý, balalardy qorǵaý jáne densaýlyǵyn nyǵaıtýǵa arnalǵan topta 10 bala tárbıelenip jatyr. Olardyń analary ýaqtyly kelip, balalaryn kórip turady. Dárigerler, psıhologtar, pedagogtar otbasy qundylyǵyn nasıhattaıdy»,- dedi Q.Imanalın.
