«Úmit sáýlesi» atty jańa kitap oqyrmanǵa jol tartty
Atalmysh jańa kitapqa Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyuly óz pikirin bildirgen. Onda Bas múftı bylaı deıdi: «Avtor Taǵanuly Naýryzbaı Ótpenov - kóp jyl din salasynda aıanbaı qyzmet atqaryp, el yqylasyna bólenip júrgen jan. Din nasıhatyndaǵy talaı jylǵy tájirıbesin ortaǵa salǵan ol kitabynda ıslamdaǵy qundylyqtar júıesine erekshe mán berip, ózgeden erek umtylyp, tyń taqyryptarǵa qalam tartyp, oqyrmandarǵa jańa týyndy usynyp otyr. Aıtalyq, adamı minez, adamgershilik qasıetterdi sóz etýmen qatar, «Qaıǵyny seıiltý», «Mansap - ýaqytsha lázzat», «Dostyq», «Keshegi tarıh ótti, erteńgi belgisiz, búgingiń - syı» syndy taqyryptar ıslamnyń názik tustarynyń syrlaryn tereńirek asha túskendeı».
Mine, avtor N.Taǵanuly rýhanı álsizdikke, turmystyń aýyrtpalyǵyna dýshar bolǵan jandarǵa demeý bolý maqsatymen qolyna qalam alyp, oı elegin qaǵaz betine túsirýdi jón sanaǵan.
Sııasy keppegen tyń eńbeginde avtor oqyrmanǵa oı salarlyq ónegeli taqyryptardy toptastyra kele, aıat-hadısterdiń astarly mánin túsindirip, kúndelikti ómirge qajetti aqyl-keńester men musylmandyq izgi qasıetterdi de sóz etedi.