«Úmit» daǵdarys ortalyǵy: Turmystyq zábir kórgen áıelder kóbeıip barady

Qazirgi ýaqytta elordanyń tártip saqshylary «Turmys» jedel aldyn alý is sharalaryn ótkizip jatyr. Nur-Sultan qalalyq Polıtsııa departamentiniń Saryarqa aýdandyq basqarmasynyń janyndaǵy jergilikti polıtsııa basqarmasy bastyǵynyń orynbasary Qalıbek Beısenovtyń aıtýynsha, bul sharanyń basty maqsaty – otbasylyq, turmystyq qarym-qatynasta qylmystyń aldyn alý, ıaǵnı boldyrmaý, qandaı da bir otbasylyq kıkiljiń bolǵan jaǵdaıda esepke alý.

«Qandaı da bir jaǵdaıda biz qorǵaý nusqamasyn toltyramyz. Qorǵaý nusqamasy bir aıǵa toltyrylady. ıAǵnı, kıkiljiń bolǵan otbasynda biz bir aılyq aldyn alý sharasyn júrgizemiz. Profılaktıkalyq is-shara barysynda er adam tarapynan teris áreket qaıtalanatyn bolsa, kináli adam Ákimshilik quqyqbuzýshylyq týraly kodekstiń 461-baby boıynsha jazalanady. ıAǵnı, ol bap boıynsha aıypkerge 5 AEK aıyppul salynady nemese 3 táýlikke deıin qamaýǵa alynady», - dedi Qalıbek Beısenov elorda ákimdiginiń «Úmit» daǵdarys ortalyǵynda ótken baspasóz máslıhatynda.

Polıtsııa ókiliniń aıtýyna qaraǵanda, Nur-Sultanda «Turmys» jedel aldyn alý is sharalary bastalǵaly beri «Turmystyq qarym-qatynastary týraly baptyń» buzylýy boıynsha 48 materıal sotqa joldanǵan.

«Osy 48 faktiniń bárin de biz profılaktıkalyq esepke alyp otyrmyz. Eger áıeli joldasyna aryz jazǵan kezde joǵaryda aıtqanymdaı, qorǵaý nusqamasyn toltyramyz. Eger zorlyq kórgen áıeldiń baratyn jeri joq bolsa, joldasy uryp-soǵyp úıden ketken áıelderdi biz osy «Úmit» daǵdarys ortalyǵyna ákelip, zardap shegýshige psıhologııalyq jáne zańgerlik kómek kórsetiledi», - dedi Qalıbek Beısenov.

Al «Úmit» daǵdarys ortalyǵynyń áleýmettik qyzmet mamany Svetlana Joldasovanyń aıtýyna qaraǵanda, atalmysh ortalyqtyń ashylǵanyna 6 jyl bolǵan.

«Osy alty jyldyń ishinde bizden myńnan astam adam kómek aldy. Al jyl basynan beri 149 adamdy qabyldadyq. Qazirgi tańda bizdiń ortalyqta 50 adam jatyr. Ortalyq 50 kisige arnalǵanymen, qysty kúnderi adamdardyń sany 50-den asyp ketedi. Jalǵyz elordadan emes, mysaly búgin qostanaılyq bir kisini qabyldadyq», - deıdi ol.

Ortalyq mamanynyń aıtýyna qaraǵanda, «Úmitke» kóp jaǵdaıda otbasylyq zorlyq-zombylyq kórgen áıelder túsedi. Jalǵyz kúıeýi tarapynan emes, balasynan, aǵasynan, týysqanynan, tipti týǵan ata-anasynan zábir kórgen adamdar da kelip ornalasatyn kórinedi. Ortalyq tek áıelderge arnala salynǵan. Eger balalarynyń sany 18-ge tolmaǵan bolsa, er balalar da qabyldanady.

«Mundaı ortalyqtar Qazaqstan boıynsha barlyq óńirlerde ashylyp jatyr. Jaqynda ǵana Stepnogorskide bireýi jumysyn bastady. Almatyda da úsh-tórteýi barshylyq. Álbette, bizdiń maqsatymyz – qorlyq kórgen áıelderdi shyǵaryp jiberý emes. Alty aıdyń ishinde búkil qyzmetterdi kórsetip, aıaqqa turǵyzyp, daıyn bolǵannan keıin ǵana shyǵaramyz. Al eger alty aıda taǵy bir otbasylyq máselesi sheshilmese, ornalasý ýaqytyn sozyp bere alamyz», - dedi Svetlana Joldasbaeva.

Ortalyqta áıelderge standart boıynsha qyzmet tegin kórsetiledi. Tórt mezgil tamaq beriledi. Standart boıynsha qyzmettiń 8 túri kórsetiledi eken.

«Eń bastysy turmystyq-áleýmettik kómek boıynsha kelgen kisige jeke bólme beremiz. Sol bólmede ol alty aı turady. Jıhazdary bar. Kerek-jaraqtaryn túgendeımiz. Keıin ózimizdiń zańgerlerimiz ajyrasý, alıment qujattarynyń barlyǵyn rettep, zańgerlik kómek beredi. Áleýmettik-pedagogıkalyq qyzmetkerlerimiz saǵat keshki altyǵa deıin balalaryna qaraıtyn bolady. Medıtsınalyq qyzmetkerler de bar. Áıelderdiń kóbi kúıeýinen zábir kórip, denesi kógerip keledi. Solarǵa dárigerler járdem kórsetedi», - dedi ol.

Svetlana Joldasovanyń jaýabyna qaraǵanda, jyldan jylǵa kelýshiler artyp keledi.

«Mysaly, ashylǵan jyly 9 ǵana qyzmet alýshy bolsa, qazir jyl aıaqtalmaı jatyp, 150-ge jýyq adamdy qabyldap qoıdyq. Menińshe, bul rette kıkiljiń bolǵan otbasylardaǵy erkektermen jumysy isteıtin ortalyq bolsa deımiz. Qazir biz tek áıeldermen jumys júrgizemiz. Ótken jylǵa taldaý júrgizip otyrsaq, kelýshilerdiń 70 paıyzy otbasyna qaıta qosylady. Áıeldi biz aıaǵynan turǵyzǵannan keıin ol qaıtadan otbasyna qaıtyp barady. Al kúıeýimen eshkim jumys júrgizip jatqan joq. Kerek deseńiz, kúıeýine de psıhologtyń kómegi kerek. Áıelder otbasyna qaıtyp barǵannan keıin turmystyq tartys qaıta bastalady. Keıbir kisiler eki-úsh ret keledi. Sondaı oqıǵalar jeterlik», - dedi ol.

Ortalyq mamany sonymen qatar, turmystyq kıkiljiń máselesine kelgende erkekterge zańnamalyq jaýapkershilikti qataıtqan durys degen pikirde.

«Mysaly, ótken jyly Almatyda ótken halyqaralyq semınarǵa baryp keldim. Sol kezde Germanııadaǵy áriptesterimizben áńgimelesip otyrsaq, ol jaqta mundaı máselelerdiń bárin prokýratýra qolǵa alǵan. Eger bir áıel polıtsııaǵa habarlasyp, kúıeýinen zábir kórgenin aıtyp aryzdansa, quqyq qorǵaýshylar úıinen er adamdy shyǵaryp tastaıdy eken. Ol er adam osylaısha, 14 táýlik boıy óz úıine kire almaıdy. Eger 14 táýlikte eshteńe ózgermese, áıel baryp, eriniń úıge kelmeý ýaqytyn 6 aıǵa deıin sozýǵa ótinish bere alady. Al bizde kóbinese áıelder úıinen qashyp qutylýǵa májbúr», - dedi Svetlana Joldasova.

Onyń aıtýynsha, keıde elordadaǵy «Úmit» ortalyǵynda jatqan áıelderdiń kúıeýleri kelip, ortalyq qyzmetkerleriniń mazasyn alatyn kórinedi. Sol úshin ortalyq qyzmetkerleri Polıtsııa departamentinen arnaıy bir ınspektordy ortalyqqa kezekshilikke otyrǵyzýdy surap otyr.