Úmit aqtalmady – Elbasy alpaýyt elderdiń teketiresi týraly
«Reseılik megakontınenttiń ósip kele jatqan kóliktik baılanysy Eýropa men Azııa arasynda adamzat tarıhyndaǵy teńdessiz múmkindikterdi ashyp otyr. Dál qazir bizge qaýipti aınalyp ótýge jol ashatyn, Úlken Eýrazııa da jańa múmkindikterge qol jetkizetin ashyq ári ádil dıalog kerek. Ótken ǵasyrdyń sekseninshi jyldarynyń sońy men toqsanynshy jyldardyń basy dáýirlik oqıǵalarǵa toly boldy. Ol oqıǵalardyń bel ortasynda óz kúıreýine bettep kele jatqan SSSR-dyń ydyraýy tur edi. Álem dál osy ýaqytta optımıstik kóńil-kúıde bolatyn. Qyrǵı-qabaq soǵystyń jarqyn úlgisi retinde Berlın qabyrǵasy qulady. Ol biregeı álemdi qurýǵa múmkindik bergen bolatyn. Sol kezde entýzıazm tolqynynda Fýkýıamanyń áıgili «Tarıhtyń aqyry» atty kitaby shyqqan. Álemdik tarıh toqtady, adamzat biregeı damý jolyna tústi degen qııal paıda boldy», - dedi Nursultan Nazarbaev Astana Club otyrysynda.
Elbasynyń aıtýynsha, sol ýaqytta álemdik iri qaqtyǵystarǵa núkte qoıyldy degen pikir de aıtylǵan.
«Alaıda arada 30 jyl ótkende bul úmittiń aqtalmaǵanyn kórip otyrmyz. Búkil álem boıynsha geosaıası teketiresterge, qaqtyǵystarǵa kýá boldyq. Ótip bara jatqan 2019 jyl da dramaǵa toly jyl bolyp tarıhqa enip barady», - dedi ol.
Aıta ketsek, elordada QR Tuńǵysh Prezıdenti – Elbasy Nursultan Nazarbaevtyń qatysýymen Astana Club otyrysy ótip jatyr. Kezekti basqosýǵa álemniń 23 memleketinen geosaıasat, ekonomıka men halyqaralyq qatynastar salasynyń mańdaıaldy sarapshysy retinde moıyndalǵan 50-den astam halyqaralyq spıker qatysýda. Qurmetti meımandardyń qatarynda - 3 burynǵy memleket basshysy, 5 eks-premer-mınıstr, 10 mınıstr jáne Nobel syılyǵynyń laýreaty bar.
