Umaı: qyz-kelinshekterge arnalǵan ıpotekaǵa ótinish qabyldaý bastalady
Bıyl genderlik baǵdarlamany nesıelendirýge 15,6 mlrd teńge jumsalady. Bul qarajatty «Azııa damý banki» úshinshi transh aıasynda bólip otyr.
«Umaı» baǵdarlamasy ekinshi nemese úshinshi turǵyn úı satyp alýdy kózdep otyrǵan, kirisi joǵary áıelderge arnalǵan. Bıyl biz «ADB»-men birlesip, «Umaı» baǵdarlamasyna tabysy 200 000 teńgeden aspaıtyn áıelder de qatysa alady dep sheshtik. Eger olar tólem qabilettiligin rastasa, eń tómengi 15% bastapqy jarnamen nesıe alady. Biz olarǵa bólingen qarajat aıasynda jalpy nesıelendirýdiń 20%-ǵa jýyǵyn bólýdi josparlap otyrmyz», - dep túsindirdi «Otbasy bank» AQ Basqarma tóraǵasy Lázzat Ibragımova.
«ADB» sharttaryna sáıkes Astana, Almaty, Aqtaý jáne Atyraý qalalaryna zaemnyń jalpy kóleminiń 40% aspaıtyn bóligin nemese 200-ge jýyq nesıe bólý josparlanyp otyr. Nesıeniń 60%-y oblystar men shaǵyn qalalardyń turǵyndaryna berilmek. Maqsat – óńirlerdegi áıelderdi qoldaý jáne nesıeleýde dısproportsııany boldyrmaý.
Baǵdarlama boıynsha beriletin zaemnyń eń joǵarǵy quny 30 mln teńgege deıin. Paıyzdyq mólsherleme bıyl – 14,4% (JTSM – 15,4% bastap), keıin ol 3,5%-5%-ǵa deıin (JTSM – 3,6% bastap) tómendetiledi.
Qaryz alý merzimi – 6 aıdan 25 jylǵa deıin. Bul rette turǵyn úı tańdaýda shekteýler joq, ony alǵashqy jáne ekinshi naryqtan, sonyń ishinde úlestik qatysý sharttary boıynsha satyp alýǵa bolady. Sondaı-aq, «Umaı» boıynsha baspanany jóndeý jumystaryna da 3,7 mln teńgege deıingi mólsherde qaryz alýǵa bolady.
Áleýetti qaryz alýshynyń aı saıynǵy otbasylyq tabysy 550 000 teńgeden aspasa, ol 15%-dyq bastapqy jarnamen nesıe ala alady. Al, otbasynyń ortaq kirisi aıyna 550 001 teńgeden 640 000 teńgege deıingi aralyqta bolsa, onda turǵyn úıdi 20%-dyq alǵashqy jarnamen alýǵa bolady.
Genderlik teńdikti jetildirýge negizdelgen baǵdarlamany iske asyrýǵa «ADB» bas-aıaǵy 38 mlrd teńge kóleminde qarajat bólip otyr. 2021 jyly «Umaı» baǵdarlamasy bastalǵan kezde, birinshi transh aıasynda, jalpy kólemi 8,4 mlrd teńgege 954 qazaqstandyq qyz-kelinshek qaryz alǵan bolatyn. 2022 jyly 14 mlrd teńge bólindi. Bul qarajatqa 1 119 qyz-kelinshek baspanaly boldy.
