«Umaı» baǵdarlamasy iske qosyldy: bıyl qandaı talaptar qoıylady
ASTANA. KAZINFORM – Áıelderge baspana alýǵa múmkindik beretin «Umaı» baǵdarlamasy búgin iske qosyldy. «Otbasy bank» ótinimderdi 31 tamyzdan bastap qabyldaı bastady. Bıylǵy baǵdarlamanyń múmkindikteri men talaptary jaıly Jibek Joly telearnasynyń «Búgin.LIVE» baǵdarlamasynda «Otbasy banktiń» resmı ókili Nazerke Ǵalym aıtyp berdi.
Bıyl baǵdarlama aıasynda Almaty men Astanada bastapqy jarna 20%, al basqa óńirlerde 15% bolady. Nesıe 50 mln teńgege deıin 25 jylǵa beriledi.
«Otbasy banktiń» resmı ókili Nazerke Ǵalymnyń aıtýynsha, bıyl baǵdarlamanyń negizgi talaptary ózgermegen.
Onyń aıtýynsha, «Umaı» baǵdarlamasynyń basty erekshelikteriniń biri – qatysýshy áıeldiń atynda baspananyń bar-joǵyna shekteý qoıylmaıdy. Jeke menshiginde úıi bar áıelder de baǵdarlamaǵa qatysyp, ekinshi nemese úshinshi baspanasyn satyp ala alady.
– Birinshi talap – azamat jumys isteýi kerek. Sońǵy alty aıdaǵy tólem qabiletin rastaý úshin óziniń turaqty tabysy bolýy qajet. Balalarynyń bar-joǵyna qaramaımyz. Eger turmysta bolsa, erli-zaıyptylardyń jalpy tabysy 1 mln 250 myń teńgeden aspaýy kerek. Al turmysqa shyqpaǵan jaǵdaıda bul soma tek óziniń tabysyna esepteledi, – dedi Nazerke Ǵalym.
Sonymen qatar baǵdarlama boıynsha satyp alynatyn baspana 2016 jyldan keıin salynǵan bolýy kerek, ıaǵnı eski úılerdi satyp alýǵa ruqsat etilmeıdi.
Bıyl bastapqy jarna mólsheri óńirge qaraı belgilengen. Astana men Almaty turǵyndary úshin ol 20%, al basqa óńirler úshin 15% bolady.
– Óńirler úshin 15% degen talapty jalaqy deńgeıine baılanysty engizdik. Úlken qalalarmen salystyrǵanda óńirlerge osyndaı jeńildik bolsyn degen nıet boldy. Al Astana men Almaty qalalarynda bastapqy jarna 20% bolyp qaldy. Taǵy bir aıta keterligi, bastapqy jarna birden satýshynyń qolyna beriledi. Qalǵan qarajatty «Otbasy bankinen» rásimdeıdi, – dedi bank ókili.
Nazerke Ǵalym áleýmettik jelilerde bastapqy jarnaǵa qatysty suraqtardyń kóp qoıylyp jatqanyn atap ótti.
Onyń aıtýynsha, «Otbasy bankte» burynnan depozıt ashyp, qarajat jınaǵan azamattardyń bul baǵdarlamada artyqshylyǵy bar. Bank ókiliniń túsindirýinshe, ıpotekany turǵyn úı qurylys jınaq júıesi arqyly rásimdeý kezinde paıyzdyq mólsherlemeni tómendetýge múmkindik bar. Sondyqtan depozıtte burynnan qarajaty bar azamattardyń baǵdarlamany paıdalanýda tıimdiligi joǵary bolady.
– Eger siz burynnan bastap jınap júrgen bolsańyz, bul sizge tek kómegin tıgizedi. Ipotekany rásimdegen kezde qurylys jınaq júıesi arqyly júrgendikten, sizdiń ıpotekańyzdyń paıyzdyq mólsherlemesi azaıady, – dedi Nazerke Ǵalym.
Qazirgi tańda baǵdarlamaǵa 90 mlrd teńge kóleminde qarjy bólingen.
Onyń aıtýynsha, keıin bul qarajat kólemi ulǵaıtylýy múmkin.
Al depozıtte qarajaty joq jáne baǵdarlamaǵa aldyn ala daıyndyqsyz qatysatyn azamattar úshin nesıe mólsherlemesi 14,8% bolady. Eger ıpoteka somasy 50 mln teńgeden assa, artyq qarajatty satyp alýshynyń ózi tóleýi kerek. Bul týraly taraptar notarıýs arqyly kelisim jasaıdy.
Ótinim berý úshin azamattarǵa birneshe múmkindik usynylyp otyr. Atap aıtqanda, «Otbasy banktiń» bólimshelerine baryp ótinim berýge, beıneqońyraý arqyly menedjerden onlaın keńes alýǵa nemese «Baspana market» qosymshasy men saıty arqyly jeke kabınetten ótinim berýge bolady.
Bank ókiliniń aıtýynsha, baspanalardy «Baspana market» portalynda aldyn ala ornalastyrý josparlanyp otyr.
– Bul bizde burynnan kele jatqan tájirıbe. Baǵdarlama bastalǵan kezde úılerdiń baǵasy sharyqtap ketpeýi úshin baspanalardy portalǵa aldyn ala ornalastyramyz. Mysaly qurylys kompanııasy úıdiń baǵasyn 50 mln teńge dep kórsetse, baǵdarlama bastalǵan kezde onyń baǵasyn ózdiginen kótere almaıdy, saıttaǵy baǵamen qalady. Eger qurylys kompanııasy úıdi saıttan alyp tastaýdy surasa, biz ol nysan boıynsha ıpoteka rásimdeı almaımyz. «Umaı» baǵdarlamasynda da osy shartty qoldanǵymyz keledi, – dedi Nazerke Ǵalym.
Aıta keteıik, buǵan deıin, ıpoteka rásimdeıtin áıel salymshylar erlerden kóp ekendigin jazǵan edik.
