«Umaı» áıelder ıpotekasy tamyz aıynda qaıta iske qosylady
ASTANA. KAZINFORM – Áıelderge arnalǵan «Umaı» ıpotekalyq baǵdarlamasy bıyl qaıta iske qosylady. Ótinim qabyldaý tamyz aıynda bastalady. Bul týraly «Otbasy bankiniń» basqarma tóraǵasy Lázzat Ibragımova áleýmettik jelidegi tikeleı efır barysynda málimdedi.
– «Umaı» ıpotekalyq baǵdarlamasyna qatysty jaqsy jańalyǵymyz bar. Baǵdarlamany tamyz aıynda iske qosamyz. Alǵashqy qarjy bólindi, – dedi Lázzat Ibragımova.
Baǵdarlama talaptaryna sáıkes, qatysýshylar bastapqy jarnany «Otbasy bankindegi» depozıtte jınaýy tıis.
Erejege saı resmı tabysy bar jáne sońǵy alty aıda mindetti zeınetaqy jarnalary turaqty aýdarylyp kelgen áıelder ótinim bere alady.
Buǵan deıin jarııalanǵan talaptarǵa sáıkes, alǵashqy jarna – iri qalalarda 20%-dan, óńirlerde 15%-dan bastalady.
Sondaı-aq baǵdarlama aıasynda 25 jylǵa deıingi merzimge 50 mln teńgege deıin ıpotekalyq nesıe berý qarastyrylǵan.
Eske salaıyq, «Umaı» baǵdarlamasy 2021 jyly iske qosylyp, 2023 jylǵa deıin jumys istedi. Keıin ony qarjylandyrý ýaqytsha toqtatyldy. Baǵdarlama Azııa damý bankiniń (ADB) qoldaýymen júzege asyrylady.
Bastapqyda jobany 2025 jyldyń basynda jańartylǵan talaptarmen qaıta iske qosý josparlanǵan edi. Alaıda baǵdarlamanyń iske qosylý merzimi keıinge shegerildi.
Aıta keteıik, baspanany bastapqy (jańa úı) jáne ekinshi naryqtan alýǵa bolady.
