«Umaı» áıelder ıpotekasy qashan bastalady

ASTANA. KAZINFORM – Áıelderge arnalǵan «Umaı» ıpotekalyq baǵdarlamasy shilde-tamyz aılarynda iske qosylýy múmkin. Bul týraly «Otbasy bank» AQ basqarma tóraǵasy Lázzat Ibragımova aıtty.

- «Umaı» áıelder ıpotekasy josparymyzda bar. Azııa damý bankpen memorandýmǵa qol qoıdyq. Qazir barlyq resmı qujattardy rásimdep jatyrmyz. Josparymyz boıynsha - 90 mlrd teńge. Onyń 50 paıyzy – «Jasyl» ıpotekaǵa, 50 paıyzy – «Umaı» ıpotekasyna, - dedi ol Úkimet otyrysynan keıin.

Onyń túsindirýinshe, Azııa damý banki Qazaqstan bırjasynda teńgemen oblıgatsııa ornalastyrady.

- Ol 16 paıyz bolsa, biz ony 17 paıyzben beremiz. Sony qazir tosyp otyrmyz. Bırjada atalǵan mólsherleme 12-13 paıyzǵa tómendese, baǵdarlamany shilde, tamyz aıynda bastaımyz, - dedi Lázzat Ibragımova.

Esterińizge sala keteıik, buǵan deıin baǵdarlamany 2025 jyldyń basynda jańartylǵan sharttarmen qaıta bastaý josparlanǵan edi. Biraq iske qosý merzimi keıinge shegerildi. Buryn jarııalanǵan talaptarǵa sáıkes, baǵdarlamaǵa qatysý úshin nesıe somasynyń 20%-yna deıingi mólsherdegi alǵashqy jarna «Otbasy bankindegi» depozıtte bolýy tıis. Baǵdarlamaǵa 18 ben 65 jas aralyǵyndaǵy, resmı tabysy bar jáne sońǵy alty aıda zeınetaqy jarnalaryn úzdiksiz aýdaryp kelgen áıelder qatysa alady.

Jańartylǵan sharttar boıynsha:

* Qaryzdyń eń shekti somasy 50 mln teńgege deıin ulǵaıýy múmkin;

* Otbasynyń jıyntyq taza tabysy — aıyna 950 myń teńgeden aspaýy tıis (buryn bul shek 640 myń teńge bolatyn);

* Baspanany bastapqy (jańa úı) jáne ekinshi naryqtan alýǵa bolady. Tek úıdiń paıdalanýǵa berilgen jyly 2016 jyldan erte bolmaýy shart.

Aıta keteıik, bıyl elimiz boıynsha 18,5 mln sharshy metr turǵyn úı salynady.