Ýmar Nýrmagomedovty nokdaýnǵa túsirgen Bekzat Almahan UFC-den ketti
ASTANA. KAZINFORM — UFC-diń jeńil salmaqtaǵy qazaqstandyq faıteri Bekzat Almahan — uıymnyń rosterinen shyǵaryldy, dep habarlaıdy Kazinform tilshisi.
UFC-diń resmı saıtynda Qazaqstannyń jeńil salmaqtaǵy ókili Bekzat Almahannyń mártebesi «alańǵa shyqpaıdy» dep ózgertilgen. Bul onyń tórt jekpe-jekke arnalǵan kelisimshartynyń aıaqtalýyna baılanysty UFC rosterinen shyǵarylǵanyn bildiredi.
Bekzat Almahan UFC-ge resmı túrde 2024 jyldyń basynda qosylyp, oktagondaǵy debıýtin 2024 jylǵy 2 naýryzda ótkizdi. Sportshy uıymǵa 11-1 (merziminen buryn aıaqtalǵan 10 jeńis) kórsetkishimen qaýipti nokaýter retinde kelgen. Alaıda matchmeıkerler qazaqstandyq faıterge birden óte myqty qarsylas tańdady. UFC-degi alǵashqy jekpe-jeginde ol sol kezdegi reıtıngte 13-orynda turǵan Ýmar Nýrmagomedovpen kezdesti.
Jekpe-jek Bekzattyń jeńilisimen aıaqtalǵanymen, qazaqstandyq sportshy birinshi raýndta qarsylasyn nokdaýnǵa túsire aldy. Nýrmagomedov keıin jekpe-jek barysyn baqylaýǵa alyp, tóreshilerdiń biraýyzdy sheshimimen jeńiske jetti.
Bekzat Almahan UFC-degi jalǵyz jeńisine 2025 jylǵy 10 mamyrda qol jetkizdi. Ol kanadalyq Bred Katonany birinshi raýndtyń 64-sekýndynda nokaýtpen jeńip, Katonany merziminen buryn jeńgen UFC tarıhyndaǵy alǵashqy faıter atandy.
Bekzattyń UFC-degi taǵy eki jekpe-jegi jeńilispen aıaqtaldy. 2025 jylǵy qarashada ol grýzııalyq faıter Aleksandr Topýrııaǵa tóreshilerdiń biraýyzdy sheshimimen jol berdi. Al 2026 jyldyń jazynda kelisimshart aıasyndaǵy sońǵy jekpe-jeginde brazılııalyq Jan Matsýmotodan tóreshilerdiń biraýyzdy sheshimimen jeńildi.
Osylaısha, qazirgi tańda UFC-de Qazaqstannyń bes ókili qaldy. Jeńil salmaqta Asý Almabaev uıym reıtınginde besinshi orynda tur. Osy salmaqta Álibı Ydyrys ta óner kórsetedi. Jartylaı orta salmaqta Qazaqstan atynan Nıkolaı Veretennıkov pen operatsııadan keıin ońaltýdan ótip jatqan Shavkat Rahmonov óner kórsetedi. Al jartylaı aýyr salmaqta Dııar Nurǵojaı óner kórsetip júr.
UFC tarıhynda Qazaqstannyń atynan barlyǵy 11 faıter óner kórsetken. Olardyń beseýi qazir uıymnyń qoldanystaǵy rosterinde bolsa, altaýy buryn UFC-de óner kórsetken sportshylar qatarynda.
Buǵan deıin qazaqstandyq faıterdiń UFC-den qomaqty bonýs alǵany habarlanǵan bolatyn.
Sonymen qatar qazaqstandyq faıter Jalǵas Jumaǵulov UFC-ge qaıta oralýy múmkin ekeni aıtyldy.
