«UMAI» forýmy: Elordada isker áıelder bas qosty
ASTANA. KAZINFORM – Astanada «UMAI» kásipker áıelder qaýymdastyǵynyń forýmy ótti. Oǵan elimizdiń ár óńirinen kelgen kásipker áıelder, sarapshylar men qoǵam belsendileri qatysty. Forým aıasynda jergilikti brendterdiń kórmesi men jármeńkesi uıymdastyryldy.
Іs-sharada kásipker áıelder bıznesti damytý, jeke brend qalyptastyrý, qarjylyq derbestik jáne ómirdegi qıyndyqty eńserý jaıynda pikir bólisti. Forým spıkerleri óz tájirıbesin aıtyp, tabysqa jetý jolyndaǵy kedergiler men ony eńserýdiń tásilderine toqtaldy.
Forýmnyń negizin qalaýshy Jámıla Ernazarovanyń aıtýynsha, bıylǵy kezdesýdiń basty taqyryby — «Ómir strategııasy». Onyń sózinshe, kóp áıel bar kúshin salyp eńbek etkenimen, qalaǵan nátıjege jete almaı jatady.
— Keıde adam kóp áreket etedi, kóp izdenedi. Biraq onyń bári kútken nátıjege jetkize bermeıdi. Sebebi naqty baǵyt bolmaıdy. Sondyqtan bul forýmda tek bıznes týraly emes, adamnyń ómirdegi maqsaty men ustanymyn da talqylap jatyrmyz, — dedi ol.
Jámılá Ernazarova forýmnyń negizgi maqsaty — áıelderge jańa múmkindikke jol ashyp, ózara tájirıbe almasatyn orta qalyptastyrý ekenin aıtty.
— Qazir forým kóp. Biraq kóbiniń baǵasy qymbat. Oǵan kez kelgen áıel qatysa almaıdy. Sondyqtan bilim men tájirıbe barshaǵa qoljetimdi bolǵanyn qaladyq. Munda áıelder bir-birimen tanysyp, tájirıbe bólisip, ózine qajet ortany taba alady. Biz úshin áıeldiń qaı óńirden kelgeni nemese qandaı qyzmet atqaratyny mańyzdy emes, — dedi forým uıymdastyrýshysy.
Forýmda sóz sóılegen kásipker Gúlbaný Maıǵarına bıznestegi úlken ózgerister kóbine qıyn kezeńnen bastalatynyn aıtty.
— Adamdy áreketke kóbine jaıly ómir emes, qorqynysh pen qıyndyq ıtermeleıdi. Meniń ómirimdi ózgertken de — kedeılikten qorqý boldy. Eger sol kezeń bolmaǵanda, bálkim búgin aldaryńyzda otyrmas edim, — dedi kásipker.
Onyń aıtýynsha, kez kelgen ózgeris adam óz ómiri úshin jaýapkershilik alǵan sátten bastalady.
— Ómirińdegi jaǵdaı úshin ózgelerdi kinálaýdy toqtatý kerek. Qorqynyshtan qashpaý qajet. Qatelesseń, qaıta bastaısyń. Eń bastysy — toqtap qalmaý, — dedi Gúlbaný Maıǵarına.
Forýmǵa qatysýshylardyń biri Aıgerim Bolatova da óz ómirindegi qıyn kezeń týraly aıtty. Ol 20 jasynda jol apatyna túsip, keıin birneshe jylyn ońaltýǵa arnaǵan.
— Jol apatynan keıin úıde otyryp «qalaı tabys tabamyn?» dep kóp oılandym. Sodan keıin toqýdy úırendim. Alǵashynda ózime kıim toqıtynmyn. Keıin qurbylarym qyzyǵyp, satyp ala bastady. Sol kezde muny kásipke aınaldyrýǵa bolatynyn túsindim, — dedi ol.
Onyń sózinshe, úıde bastalǵan shaǵyn is keıin jeke sheberhanaǵa aınalǵan.
— Aldymen bir toqý mashınasyn aldyq. Keıin ekinshisin, úshinshisin satyp aldyq. Bir ýaqytta úıde oryn jetpeı, jeke sheberhana ashtyq, — dedi kásipker.
Forým aıasyndaǵy jármeńkede etnostıl baǵytyndaǵy buıymdar usynǵan kásipkerler de boldy. Solardyń biri — «Baýyrsaq» brendi.
— Ózim modeler-konstrýktormyn. Sońǵy bir jyldan beri etnostıl baǵytyndaǵy buıymdar tigemin. Sómke, taqııa, jeıde sekildi ulttyq naqyshtaǵy dúnıeler jasaımyn. Osyndaı forýmdar ónimimizdi kópshilikke tanystyrýǵa múmkindik beredi, — dedi kásipker Amına Smaıylova.
Jármeńkege qatysqan bes balanyń anasy kásipker Gúlmıra Ahmetova ulttyq naqyshtaǵy qysh áshekeılerin tanystyrdy.
— Qazir qazaqy naqyshtaǵy dúnıelerge suranys joǵary. Ásirese qoldan jasalǵan áshekeılerge qyzyǵýshylyq kóp, — dedi kásipker.
Onyń aıtýynsha, bir buıymdy jasaýǵa shamamen 45 saǵat ýaqyt ketedi.
— Ár buıym birneshe ret arnaıy peshke kúıdiriledi. Keıin boıaýy men árleý jumystary jasalady. Bul — kóp ýaqyt pen uqyptylyqty qajet etetin jumys, — dedi Gúlmıra.
Ol arnaıy peshti Reseıden aldyrǵanyn, al úıindegi bir bólmeni shaǵyn sheberhanaǵa aınaldyrǵanyn aıtty.
— Bul kásip ońaı emes. Biraq súıip istegen soń sharshaǵanyńdy baıqamaısyń, — dedi kásipker.
2022 jyly qurylǵan «UMAI» qory búginde otandyq dızaınerler men kásipker áıelderdiń basyn qosqan qaýymdastyqqa aınaldy. Úsh jarym jyl ishinde uıymnyń túrli jobasyna bes myńǵa jýyq áıel qatysqan.
Aıta keteıik, buǵan deıin Qazaqstanda áıelderdiń kásipkerlik belsendiligi 54%-ǵa jetkeni habarlaǵan edi.
