Erkek toqtylardy áketýge sandyq shekteý engiziledi

ASTANA. KAZINFORM – Bıyl 5 qarashadan bastap Qazaqstan aýmaǵynan úshinshi elderge jáne Eýrazııalyq ekonomıkalyq odaq elderine buqashyqtar men toqtylardy eksporttaý kvotasyn bólý qaǵıdalary kúshine enedi. Bul norma alty aı merziminde áreket etedi.

Aýyl sharýashylyǵy mınıstrligi málimetinshe, 4 aıdan asqan erkek toqtylardy áketýdiń sandyq lımıti – 120 myń. Onyń ishinde bordaqylaý alańdary úshin – 60 myń, taýar óndirýshiler úshin – 60 myń.

Qazaqstan aýmaǵynan 4 aıdan asqan erkek toqtylardy áketýge kvota alý úshin bir bordaqylaý alańyna arnalǵan lımıt birjolǵy jáne jıyntyq mólsherde bordaqylaý alańy qýatynyń 30 paıyzynan aspaıdy, al bir taýar óndirýshige – kvotanyń qoldanysynyń búkil kezeńine 500-den aspaıdy.

Qýattylyǵy 5000 jáne odan da kóp bordaqylaý alańdary úshin 4 aıdan erkek toqtylardy áketýge arnalǵan lımıt kvota qoldanysynyń búkil kezeńine 1500-den aspaýǵa tıis.

Bul rette, kvota bólý sátinde bordaqylaý alańyndaǵy nemese taýar óndirýshidegi maldyń naqty sany karantındeýge ótinim bergen kezde tirkelgen kvotanyń suratylǵan kóleminen eki ese kóp bolýǵa tıis.

Áketýge josparlanǵan janýarlar aýyl sharýashylyǵy janýarlaryn birdeılendirý jónindegi derekqorda ótinish berýshiniń – bordaqylaý alańynyń nemese taýar óndirýshiniń atyna karantınge qoıýǵa deıingi 3 aıdan erte emes merzimde tirkelýge tıis.

Kvota epızootııalyq zerttep-qaraý aktisiniń qoldanylý merzimi ishinde jaramdy jáne janýarlardy áketý osy merzim sheginde júzege asyrylady.

Kvotalar «E-lıtsenzııalaý» portalynda bólinedi jáne «Sandyq shekteýler (kvotalar) engizilgen kezde taýarlardyń jekelegen túrleriniń eksportyna jáne (nemese) ımportyna lıtsenzııa berý» memlekettik qyzmet kórsetý qaǵıdalaryna sáıkes jekelegen taýar túrlerin eksporttaýǵa lıtsenzııa alý kezinde avtomatty túrde beriledi.

Aıta ketý kerek, lıtsenzııa ıeleri lıtsenzııanyń qoldanylý merzimi ótkennen keıin kúntizbelik 15 kún ishinde ýákiletti organǵa Eýrazııalyq ekonomıkalyq komıssııa keńesiniń 2023 jylǵy 24 qarashadaǵy № 125 sheshimimen bekitilgen Úshinshi eldermen saýdada tarıftik emes retteý sharalary qoldanylatyn taýarlardyń biryńǵaı tizbesine engizilgen taýarlardyń eksportyna jáne (nemese) ımportyna lıtsenzııalar men ruqsattar berý qaǵıdalaryna № 3 qosymshaǵa sáıkes nysan boıynsha taýarlardyń eksportyna jáne (nemese) ımportyna lıtsenzııanyń oryndalýy týraly anyqtamany usynady.

Tolyǵyraq buıryqpen myna silteme arqyly tanysýǵa bolady. 

«Sandyq shekteýler (kvotalar) engizilgen kezde jekelegen taýar túrlerin eksporttaýǵa jáne (nemese) ımporttaýǵa lıtsenzııa berý» memlekettik qyzmetin kórsetý qaǵıdalarymen tolyǵyraq myna silteme arqyly tanysýǵa bolady. 

Іri qara mal buqashyqtaryn shyǵarýǵa ýaqytsha tyıym salynǵanyn jazǵan bolatynbyz.