Uljan Sársenbek Azııa chempıonatynda shırek fınaldan asa almady

ASTANA. KAZINFORM - Mońǵolııa astanasy Ulanbatyr qalasynda ótip jatqan World Boxing aıasyndaǵy 2026 jylǵy Azııa chempıonatynda el quramasynan 5 sáýirde Uljan Sársenbek (57 keli) jarysty aıaqtady.

Otandasymyz shırek fınalda taılandtyq Pýnraýe Rýenrospen sheberlik baıqasty.
Uljannyń qarsylasy ońaı bolǵan joq. Taılandtyq boksshy álem chempıonatynyń birneshe márte júldegeri boldy. Sondaı-aq 2024 jyly Azııa chempıonatynyń jartylaı fınalynda Taıland sportshysy Uljannan basym túsken edi.

Jekpe-jek barysynda otandasymyz shıraq qımyldaýǵa kóńil bóldi. Degenmen qarsylasy da óz múmkindigin múlt jibermeýge tyrysty.

Nátıjesinde Uljan qarsylasyna ese jiberip, jarys jolynan shyǵyp qaldy.

Eske salsaq, budan buryn el quramasynan Áıgerim Sáttibaeva (48 keli) álem chempıonatynyń 2 márte qola júldegeri, ózbekstandyq Sabına Bobokýlovany jeńip, jartylaı fınalǵa joldama aldy.

Qazaqstandyq taǵy úsh boksshy Qazaqstan ýaqytymen 14:00-de bastalatyn keshki sessııada synǵa túsedi. Aldymen 4-jupta Sabyrjan Aqqalyqov (75 keli) japonııalyq Taıga ıAgımen sharshy alańǵa shyqsa, 7-jupta Erasyl Jaqpekov (80 keli) ózbekstandyq álem chempıony Fazlıddın Erkınboev, 11-jupta Saǵyndyq Toǵambaı (90 keli) qytaılyq Hýejen Hanmen qolǵap túıistiredi. 

Aıta ketsek, 4 sáýirde qurlyqtyq dodada Aıbek Oralbaı (90 keliden joǵary), Valentına Halzova (75 keli), Ertýǵan Zeınýllınov (65 keli), Orazbek Asylqulov (60 keli) jartylaı fınalǵa joldama alsa, Sanjar Tashkenbaı (50 keli), Laýra Esenkeldi (65 keli) jarys jolyn aıaqtady.