Ulytaýlyq ustaz oqýshylarymen birge «Baggı» kóligin qurastyrdy

JEZQAZǴAN. QazAqparat - Ulytaý aýdany oqýshylar úıiniń «Bastapqy tehnıkalyq modeldeý» úıirmesiniń jetekshisi Qazbek Muqanov oqýshylarymen birge «Baggı» dep atalatyn sporttyq avtokólik qurastyrdy, dep habarlaıdy QazAqparat.

Saǵatyna 50-60 shaqyrym jyldamdyqpen júretin jer talǵamaıtyn «Baggı» ár tehnıka quraldarynan jınalǵan. Burylys mehanızmi VAZ-2109 mashınasynan, dóńgelekteri kvadratsıkl, matory mototsıklden alynǵan. Dybys sıngaly, farlary bar kólik týrıstterge taptyrmaıtyn qozǵalys quraly. Úıirme jetekshisiniń aıtýynsha, «Baggı» Ulytaý taýlaryn aralaýǵa yńǵaıly, janarmaıdy da kóp qajet epteıdi.

«Buǵan deıin oqýshylar shaǵyn modeldermen aınalysyp, mashına, ushaq jasap júrdi. Byltyrǵy oqý jylynda velomobıl jasap, oqýshylarmen birge matorly mashına qurastyrýdy oıǵa alǵan bolatynbyz. Dánekerleý jumystaryn ózim jasadym, oqýshylarym Temirlan Serik, Sherhan Qýanysh jáne Ersultan Boranbaı detaldaryn qurastyryp, boıaýǵa kómektesti», - deıdi úıirme jetekshisi Qazbek Muqanov.

Ustaz ben oqýshylar «Baggı» sporttyq kóligin 2 aıda qurastyryp shyqqan. Yqsham ári yńǵaıly tehnıka kóptiń qyzyǵýshylyǵyn týdyryp, «Bastapqy tehnıkalyq modeldeý» úıirmesine jazylýǵa nıetti er balalar qatary artqan. Ulytaýlyq ustaz shákirtterin tehnıkaǵa baýlyp qana qoımaı, osy isti damytyp óńir týrızmine de úles qosýdy josparlap otyr.