Ulytaýlyq qart jıhankez Túrkistanǵa jetti

TÚRKІSTAN. QazAqparat - Búgin jańadan qurylǵaly otyrǵan Ulytaý oblysynan kıeli Túrkistan shaharyna 72 jastaǵy jıhankez Sársenbaı Qotyrashov kelip jetti. «Ulytaýǵa bardyń ba?» dep atalatyn qarııanyń bul marafony 31 naýryz kúni bastalǵan, dep habarlaıdy QazAqparat tilshisi.

«Men bul marafonǵa jeti jyl boıy daıyndaldym. Maqsatym – qolóner sheberlerimen kezdesip, halyqqa Ulytaý tarıhyn tanystyrý. Sonyń ishinde «Kókmaısa» festıvalin nasıhattaý da bar. Qazaqstannyń barlyq óńirlerin aınalyp ótýdi josparlap otyrmyn. Kúni keshe ǵana Qyzylorda oblysynan ótip, kıeli Túrkistanǵa kelip jettim. Kútip alyp, qonaqjaılyq kórsetip jatqan barshańyzǵa alǵys aıtamyn. Erteń Alla qalasa Shymkentke jolǵa shyǵamyn»

, - deıdi jıhankez.

Qolarbasyn janyna serik etken Sársenbaı qarııany Túrkistan oblystyq «Rýhanı jańǵyrý» keńsesiniń qyzmetkerleri kútip aldy. Syı-sııapat jasap, saparyna sáttilik tiledi.

Qarııa kúnine 40 shaqyrym jol júredi. Aryqaraıǵy baǵdary - Taraz, Almaty, Taldyqorǵan qalalary. Ol Qazaqstannyń úzdik qolónershileriniń tizimin jasap shyǵýdy josparlapty.

«Azapty bolsa da, alǵa qoıǵan maqsatym jaımen oryndalyp keledi»

, - deıdi aqsaqal.

Sársenbaı Qotyrashov - Ulytaý ulttyq tarıhı-mádenı jáne tabıǵı mýzeı-qoryǵynyń qyzmetkeri, eńbek ardageri. Ol jaıaý marafonǵa 31 naýryzda shyqqan bolatyn. Jospary boıynsha qarashaǵa deıin búkil óńirdi aralaıdy.