Ulytaýlyq 72 jastaǵy saıahatshy Mańǵystaý óńirine jaıaý jetti

AQTAÝ.QazAqparat – Ulytaý oblysynyń 72 jastaǵy saıahatshysy Sársenbaı Qotyrashov Mańǵystaý oblysynyń Beıneý aýdanyna jaıaý jetti. Ony mańǵystaýlyq jol saqshylary qarsy aldy, dep habarlaıdy QazAqparat tilshisi.

«Aqsaqaldy Beıneý-Boranqul tasjolynda patrýldik polıtsııa rotasynyń qyzmetkerleri N.Shyńǵys pen Q.Pirjanov qarsy aldy. Olar saıahatshynyń qal-jaǵdaıyn bilip, aldaǵy saparyna sáttilik tilep shyǵaryp saldy», - dep málim etti Mańǵystaý oblysy Polıtsııa departamentinen.

Ulytaý ulttyq tarıhı-mádenı jáne tabıǵı murajaı-qoryǵynyń qyzmetkeri jáne eńbek ardageri Sársenbaı Qotyrashov el óńirleri boıynsha jaıaý marafonyn 31 naýryzda bastaǵan bolatyn. 72 jastaǵy aqsaqal qarasha aıyna deıin búkil eldi aralap shyqpaq.

Ulytaýdan shyqqan qarııa 13 kúnde Qyzylordaǵa jetti. 11 mamyrda 1 700 shaqyrymdy artqa tastap, Almaty qalasyna keldi. Keıin toǵyzynshy óńir – Pavlodar oblysyna aıaldady. 60 kelilik arbasyn súıregen saıahatshy shilde aıynyń basynda Astana qalasyna jetti. Odan ári jaıaý marafonshy 4,5 myń shaqyrymdy artqa tastap, Petropavlǵa at basyn tiredi. Tilshilerge suhbat bergen ol úsh aı boıy 12 oblysty, 15 qalany aralap ótkenin aıtty. Jolda alty aıaq kıim aýystyrǵan. Alda 5 oblys – 3,5 myń shaqyrymdy eńserýi kerektigin jetkizdi.

Qarııa bul saparyn alty jyl buryn josparlaǵan. Saıahatshynyń eń sońǵy toqtalatyn núktesi Aqtaý qalasy bolmaq.