Ulytaýǵa byltyr 14 myńnan astam týrıst kelgen
ASTANA. QazAqparat - Ulytaýǵa byltyr 14 myńnan astam týrıst kelip, tarıhı eskertkishter men kıeli óńirlerdi aralap qaıtqan. Bul týraly «Ulytaý» ulttyq tarıhı-mádenı jáne tabıǵı mýzeı-qoryǵy dırektorynyń orynbasary Baıan Shaıgózova málim etti, dep habarlaıdy QazAqparat tilshisi.
«Biz keıingi 8 jyldyń ishinde týrızmdi damytý úshin birqatar is-sharany atqaryp kelemiz. Bizdiń mýzeı Qazaq ulttyq geografııalyq qoǵamymen, «National Geographic Qazaqstan» jýrnalymen seriktes. ıAǵnı, úlken-úlken seriktesterimiz barshylyq. Qordy saqtaý jumystaryna keletin bolsaq, qorymyzǵa bıyl 63 jádiger qabyldanyp, onyń 34-i negizgi qorǵa engizildi. Sondaı-aq, 15 etnografııalyq jádigerimiz qaıta qalpyna keltirildi. Muralardy qalpyna keltire alatyn bizde ismerlerimiz ben sheberlerimiz bar», - deıdi Baıan Shaıgózova QR Mádenıet jáne sport mınıstrliginde ótken baspasóz máslıhatynda.
Onyń aıtýynsha, mýzeı-qoryǵynyń arhıtektýralyq toby respýblıkalyq jáne jergilikti mańyzy bar tarıhı keshenderde, Joshy han, Alasha han, Dombaýyl, Talsaı keshenderi, Dýlyǵaly meshiti, Altyn shoqy, Áýlıe taý eskertkishterine annotatsııalyq máni bar bannerler ornatqan.
«Eskertkishti biz qorǵap, saqtaý úshin eń aldymen qorshaýymyz kerek. Qorshaý bolatyn bolsa, olardy maldan da, basqadan da saqtaı alamyz. Mýzeı qoryǵy janynan qurylǵan arhıtektýra toby ustahana ashqan bolatyn. Temirden túıin túıetin ustalarymyz qorshaý sharbaqtaryn jasaıdy. Kóptegen eskertkishti keleshekke qaldyrý úshin ózimizdiń qoltańbamyzdy qaldyrmasaq, eskertkishterdi ǵasyrlar boıy saqtap qala almaımyz», - deıdi ol.
Baıan Shaıgózova osyndaı jumystardyń arqasynda Ulytaý keletin týrısterdiń sany jyl sanap artyp kele jatqanyn tilge tıek etti.
«Ekspozıtsııa jáne ekskýrsııa týraly aıtar bolsaq, byltyr Ulytaýǵa ekskýrsııaǵa 14 myńnan astam týrıst kelip ketti. Onyń 200-den astamy - sheteldikter. Týrısterdiń bári bizdiń óńirge kelgennen keıin tarıhı óńirlerge barady. Qysymyz qatal, klımatymyz sýyq bolǵandyqtan, maýsymdyq jumystar bizde mamyr aıynan bastalyp, qyrkúıekte aıaqtalady. Alaıda qysta da ekskýrsııaǵa keletinder barshylyq», - deıdi ol.
Foto: egemen.kz
