Ulytaýdan jaıaý shyqqan marafonshy aqsaqal Qyzylordaǵa jetti

QYZYLORDA. QazAqparat - Ulytaýlyq 72 jastaǵy aqsaqal Sársenbaı Qotyrashov 13 kúnde Qyzylordaǵa jetti. Marafonǵa qatysýshyny Salıhıtdın Aıtbaev atyndaǵy kórkemsýret galereıasynda Syr eliniń turǵyndary qoshemetpen qarsy aldy, dep habarlaıdy QazAqparat.

Aqsaqaldy qalaǵa kireberiste oblystyq «Dástúr» qolóner ortalyǵynyń qyzmetkerleri men dástúrli óner jáne etnopedagogıka ortalyǵynyń qyzmetkerleri, sondaı-aq jedel járdem brıgadasy qarsy aldy.

Dárigerler qashyqtyqqa qaramastan marafonshy ózin jaqsy sezinetinin aıtty.

«Meniń bul Qyzylordaǵa alǵash kelýim. Kún jyly, adamdar qonaqjaı. Men úshin Salıhıtdın Aıtbaev atyndaǵy kórkemsýret galereıasynda saltanatty qabyldaý uıymdastyryldy. Oblystyq «Dástúr» qolóner ortalyǵynyń, Dástúrli óner jáne etnopedagogıka ortalyǵynyń qyzmetkerleri BAQ ókilderimen, mádenıet qyzmetkerlerimen, áriptesterimmen kezdesý uıymdastyrdy. Meni Túrkistannan arnaıy kelgen qolónershi aqsaqal Pahraddın qarsy aldy. Bul men úshin kútpegen jaǵdaı boldy», - deıdi marafonshy.

Sársenbaı Qotyrashov kezdesýge qatysýshylarǵa saparynyń maqsatyn aıtyp berdi.

«Qyzylordaǵa barar jolda 100-ge jýyq adamdy kezdestirdim, arasynda keıbireýi ǵana Ulytaýdyń tarıhy, qymyz merekesi týraly biledi eken. Men olarǵa Ulytaý jaıly biraz áńgime aıttym. Sondaı-aq, segiz qolónershiniń telefon nómirin jazyp aldym. Saparymnyń sońyna deıin olardyń sany kem degende 1000-ǵa jetedi dep úmittenemin», - deıdi aqsaqal.

Aıta keteıik, Sársenbaı Qotyrashov 31 naýryzda jolǵa shyqty.

Onyń maqsaty – elimizdiń basqa óńirleriniń turǵyndaryn Ulytaý aýdanynyń tarıhymen jáne kıeli jerlerimen tanystyrý, sondaı-aq qolónershilermen kezdesý.

Ol Qyzylordadan Túrkistanǵa, odan ári Shymkentke, Tarazǵa, sodan keıin búkil el arqyly Aqtaýǵa jetýdi josparlap otyr.

Aqasaqal qarashaǵa deıin Qazaqstannyń búkil óńirlerin aralaýdy kózdep otyr.