Ulytaýdaǵy «Jez kıik» festıvaline Eýropa, Azııa jáne Latyn Amerıkasynan tanymal ánshiler keledi
QARAǴANDY. QazAqparat - 12-14 shildede Qazaqstannyń kıeli jeri - Ulytaýda «Jez kıik» І Halyqaralyq festıvali ótedi, dep habarlaıdy Qaraǵandy oblysy ákimdiginiń resmı saıty.
Aldaǵy aýqymdy mádenı forýmnyń baǵdarlamasy týraly tolyǵyraq Qaraǵandy oblysynyń Mádenıet, muraǵattar jáne qujattar basqarmasynyń jetekshisi Erkebulan Aǵymbaev Aımaqtyq telekommýnıkatsııalar qyzmetinde ótken brıfıng barysynda aıtyp berdi.
- «Jez kıik» І Halyqaralyq folklorlyq ujymdar festıvali «Rýhanı jańǵyrý» baǵdarlamasy boıynsha uıymdastyrylǵan. Búginde baǵdarlamanyń tujyrymdamasy men baǵdarlamasy jasaqtaldy. 13 shildede «Ulytaý» etno-rok-tobynyń jeke kontserti ótedi, - dep málim etti Erkebulan Aǵymbaev. - Festıvalge Meksıka, Perý, Polsha, Reseı, Túrkııa, Tájikstan, Frantsııa, Shotlandııa, Japonııanyń
11 kásibı ujymdary, sondaı-aq Qazaqstannan eki ujym: «Arqa sazy» folklorlyq ansambli (Qaraǵandy) jáne «Qobyz saryny» qobyzshylar ansambli (Taldyqorǵan) qatysady.
Ulytaý aýdanynyń Bolatsaı mekeninde etnoaýyl qurylady. Onda 18 kıiz úı, sahna, oıyn alańdary, altybaqan, saýda shatyrlary, qolóner sheberlerine arnalǵan dúńgirshekter, shaǵyn sáýlet músinderi ornatylady.
Birinshi kúni kontsert fınalynda barlyq qatysýshylar men qonaqtar «Qara jorǵa» bıin bıleıdi.
Festıvaldiń maqsaty - Ulytaý aýdanynda týrızmdi damytý, sondaı-aq folklorlyq ónerdi alǵa jyljytý. Shara sheńberinde sonymen qatar týrıstik agenttikter forýmy ótedi.
14 shildede festıval Jezqazǵan qalasyndaǵy Keńgir sý qoımasynyń jaǵalaýynda jalǵasatyn bolady.
- Jezqazǵanda festıvalǵa qatysýshylardyń sherýi jáne klassıkalyq mýzyka keshi ótedi. Oǵan 21 ánshi qatysady. Klassıkalyq mýzyka keshin ataqty ánshi Bıbigúl Tólegenova ashady, - dedi baıandamashy.
Kórermender aldynda óziniń ónerlerin túrli elderden kelgen klassıkalyq mýzyka sheberleri kórsetedi: Shenol jáne Gıýlchohra Talynly (Túrkııa), Anna Rıan (Avstrııa), Marko Boenı (Italııa), Asmık Leolıan (Armenııa), Jeńisbek Pııazov (Ózbekstan), Igor Podgorný (Moldavııa), Vladımır Moroz (Reseı), Ilham Nazarov (Ázerbaıjan), Aıman Musaqojaeva jáne Nurjamal Úsenbaeva (Qazaqstan) jáne taǵy basqalary.
Festıval folklorlyq jáne klassıkalyq mýzyka gala-kontsertimen aıaqtalady. Sońynda merekelik otshashý bolady.
