Ulytaýdaǵy Jezkıik festıvaline sheteldik mýzykanttar keldi

QARAǴANDY. QazAqparat - Serbııa, Vengrııa, Italııa jáne Ispanııa mýzykanttary Jezkıik mýzyka festıvaline keldi. «Rýhanı jańǵyrý» baǵdarlamasy aıasynda uıymdastyrylatyn shara 24 tamyz kúni Qaraǵandy oblysynyń Ulytaý aýdanynda bastalady, dep habarlaıdy QazAqparat.

Óńirlik kommýnıkatsııalar qyzmeti alańynda ótken brıfıngte sheteldik qonaqtar óz áserlerimen bólisti. Olar óz úmitteri jaıly jáne kóshpendilerdiń xalyq mýzykasymen tanysqandary týraly aıtyp berdi.
Mýzykanttardyń aıtýyna qaraǵanda, Qazaqstanǵa kelýge olar ótken jyly Jezkıik 1-inshi festıvalinde bolǵan áriptesteriniń áńgimelerinen soń nıet bildirgen eken.

«Men alǵash ret bul festıval týraly meksıkalyq mýzykanttardan estidim. Olar bul shara týraly óte jaqsy pikir bildirdi. Sonymen qatar, bul festıval endi ǵana qanat jaıyp keledi. Oǵan qatysý arqyly ózimiz úshin jańa nárse ashqymyz keldi. Bizdiń top 1991 jyldan beri gastroldik saparlarǵa shyǵyp keledi, kóptegen elderde boldyq. Biraq Qazaqstanǵa alǵash ret kelip otyrmyz. Bul biz úshin óte qyzyqty tájirıbe», - deıdi Ispanııadan kelgen Marııa Gýerrero Gıtıerrez.
Qonaqtar bizdiń elimizdiń mádenıetimen jáne mýzykalyq dástúrlerimen jaqyn tanysyp úlgergen joq. Degenmen, osy joly múmkindikti jiberip almaıtyndaryn aıtady.
«Árıne, biz basqa elderdegi túrli festıvalderde qazaq halyq mýzykasyn estidik, biraq ony egjeı-tegjeıli zerttemedik. Kúılerińizden alǵan alǵashqy áserimiz biz úshin erekshe. Alaıda, tyńdaı bastaǵanda, barlyǵyn notalar boıynsha bólip, bul óte tereń jáne qyzyqty mýzyka ekenin túsinesiń», - deıdi ıtalııalyq Petro Maskıandaro.
Olar Ulytaýda óz halqynyń shynaıy mýzykasyn pash etetinin aıtty. Sol arqyly óz elderiniń tarıhymen, dástúrlerimen jáne fılosofııasymen tanystyrmaq.
«Mýzyka - ámbebap til. Ony aýdarýdyń qajeti joq, ol bárine túsinikti. Dál osy mýzyka arqyly biz Italııanyń ómiri - mahabbat pen qýanyshymyzdy jetkizgimiz keledi», - dep túsindirdi Petro Maskıandaro.

Esterińizge sala keteıik, Jezkıik 2-inshi etnıkalyq mýzyka festıvali erteń, 24 tamyzda, Ulytaý aýdany, Bolatsaı jerinde bastalady. Ol «Rýhanı jańǵyrý» baǵdarlamasy aıasynda uıymdastyrylǵan. Oǵan MORESCA NOVA (Italııa),CARMEN GUERRERO FLAMENCO (Ispanııa), Serbian Abrasevic band(Serbııa), Dunaj banda (Vengrııa) toptary qatysady.
Sondaı-aq, sahnada qazaqstandyq oryndaýshylar da óner kórsetedi: Aıgúl Úlkenbaeva, Janǵalı Júzbaev, Aıgúl Qosanova, Uljan Baıbosynova, aıtyskerler Amanjol Áltaev jáne Sara Toqtamysova, «Hassaq» etnotoby. Festıvaldiń sońynda Qaraqat Ábildına men Qydyráli Bolmanov, «Ulytaý» toby, aty ańyzǵa aınalǵan «Dos Muqasan» toby, «Altyn batyr» step – toby, «Alataý serileri» toby óner kórsetedi.
Festıval qonaqtary úshin kóshpendilerdiń turmysynda dástúrli paıdalanylǵan kıiz, aǵash jáne basqa da materıaldardan jasalǵan buıymdar jasaý boıynsha sheberlik-sabaqtar uıymdastyrylady. Sondaı-aq, qazaq ulttyq taǵamdary ázirlenip, oıyndar ótkizedi.