Ulytaýda zańsyz kıik aýlaǵan polıtsııa kapıtany ustaldy
ASTANA. QazAqparat - Qaraǵandy oblysynda zańsyz kıik aýlaǵan polıtsııa kapıtany jaýapqa tartylýda. Bul týraly QazAqparat QR AShM orman sharýashylyǵy jáne janýarlar álemi komıtetiniń baspasóz hatshysy Sáken Dildahmetke silteme jasap habarlaıdy.
2018 jyldyń 25 jeltoqsanynda Qaraǵandy oblysynda tabıǵat qorǵaýshy ınspektorlary Nura aýdanynyń aýmaǵyna reıd júrgizgen. Reıd barysynda «Janbóbek» aýylynan 30 shaqyrym jerde synyp qalǵan Toıota Lend Krýzer-100 ben Toıota Lend Krýzer-80 avtokólikteri kezdesken.
«Avtokólikterdiń izimen ınspektorlar júre otyryp, atylǵan 18 kıiktiń tutas etin tapty. Inspektorlar oqıǵa ornynan iz sýytyp ketken adamdardy izdestire bastady. Shubarkól aýyldyq okrýginiń ýchaskelik polıtsııasynyń aqparaty boıynsha ınspektorlar Ulytaý aýdanynyń Alǵabas aýylyna shyqty. Alǵabas aýylynda Ulytaý aýdandyq ІІB polıtsııasynyń ýchaskelik ınspektory Bralınov M.J-nyń saraıynan atylǵan 12 kıiktiń tutas eti tabyldy», - dedi Sáken Dildahmet Feısbýk paraqshasynda.
Qazirgi ýaqytta atalmysh is boıynsha Qylmystyq kodekstiń 337-baby 4-bóligi boıynsha qylmystyq is qozǵaldy.
