Ulytaýda týrıstik ortalyq pen sanatorıı salynady

ASTANA. QazAqparat – Ulytaý oblysynda jańa týrıstik ortalyq pen jańa áýe reısteri ashylady. Bul týraly Ulytaý oblysynyń ákimi Berik Ábdiǵalıuly aıtty, dep habarlaıdy QazAqparat tilshisi.

Aıta keteıik, búgin Úkimette Ulytaý oblysyn qaıta jańǵyrtý jónindegi keshendi jospar tanystyryldy.

«Óńirge týrısterdi tartý úshin Jezqazǵan qalasynda qonaq úı keshenderi, Ulytaý aýdanynda týrıstik ortalyq jáne sanatorıı úlgisindegi demalys úıi salynady. Kólik jáne logıstıka baǵyttary boıynsha oblys ortalyǵynda birneshe joba qaralyp jatyr. Sonyń ishinde, jaqyn arada Shymkent qalasymen jańa áýe qatynasyn ashý josparlanýda», - dedi Berik Ábdiǵalıuly Úkimettiń búgingi otyrysynda.

Sonymen qatar 227 km oblystyq mańyzy bar avtojoldar men 118 km qalaishilik jáne kentishilik joldardy salý, rekonstrýktsııalaý jáne jóndeý josparlanyp otyr.

Odan bólek, mektepke deıingi bilim berý jáne medıtsınalyq mekemelerdiń, ınfraqurylymnyń jetispeýshiligi problemalaryn sheshý úshin 4 balabaqsha, 4 oqýshylar saraıy jáne 5 densaýlyq saqtaý nysanyn salý kózdelgen. Sondaı-aq, keshendi josparda oblystyń 10 sport nysanyn salý men rekonstrýktsııalaý kózdelgen.

Buǵan deıin Berik Ábdiǵalıuly óńirdiń sheshilmeı jatqan ózekti máseleleri týraly aıtyp berdi.

Foto: vsegda-pomnim.com