Ulytaýda týrısterge arnalǵan aqparattyq dúńgirshek ashyldy
ULYTAÝ. QazAqparat - Qaraǵandy oblysynyń Ulytaý aýdanynda týrısterge arnalǵan aqparattyq dúńgirshek ashyldy, dep habarlaıdy QazAqparat.
Otandyq jáne sheteldik týrısterge Ulytaý aýdany, onyń tarıhı-mádenı eskertkishteri men týrızm ındýstrııasy týraly úsh tilde tolyqqandy aqparat beretin dúńgirshek «Ulytaý» qoryq-murajaıy janynan ashyldy.
Qoryq-murajaıdyń baspasóz hatshysy
Zeınet Musabaevanyń aıtýynsha, mundaǵy maqsat - Ulytaýdaǵy týrısttik nysandar týraly básekege qabiletti aqparattyq kontent qurý.
«Bunymen qosa, Ulytaýda qolaıly týrıstik klımat qalyptastyrýdyń bir baǵyty - qonaq kútý mádenıetin damytý. Osylaısha, dúńgirshek qonaqtarǵa kórsetiletin qyzmetterdiń sapasyn kóterýge baǵyttylǵan. Qazir álemde etnografııalyq týrızmge suranys artyp keledi. Sonymen qatar, qolóner - ulttyq mádenıettiń jáne eldegi týrızm ındýstrııasynyń bir salasy bolyp sanalady. Osy sebepti dúńgirshekke Ulytaý týraly kitaptar, týrısttik aqparattar jazylǵan býkletter, broshıýralar, kádesyılar men jergilikti sheberlerdiń qolynan shyqqan buıymdar qoıylǵan», - dep atap ótti qordyń baspasóz hatshysy.
Aıta keteıik, Ulytaý aýdanynda týrızmdi damytý maqsatynda etnoaýyl salynady. Bul týraly QR Prezıdenti Nursultan Nazarbaevtyń tóraǵalyǵymen ótken Úkimettiń keńeıtilgen májilisinde Qaraǵandy oblysynyń ákimi Erlan Qoshanov aıtqan bolatyn.
«Rýhanı jańǵyrý» baǵdarlamasy aıasynda ótken jyldyń ózinde ǵana óńir metsanattary 74 áleýmettik nysan salǵan jáne jóndeýden ótkizgen.
Sondaı-aq Ulytaýda Sapar ortalyǵyn salý josparlanǵan. Olardyń ınfraqurylymynda meıramhanalar, kádesyı dúkenderi, sheberhanalar, konferentsııa zaldary, tarıhı jáne zertteý jıyndary ótetin zaldar shoǵyrlanatyn bolady.
Sonymen qatar «Rýhanı jańǵyrý» baǵdarlamasy aıasyndaǵy «Qazaqstannyń kıeli jerleriniń geografııasyna» engen Ulytaý óńiri qalaı damytylatyny týraly Qaraǵandy oblysynyń ákimi Erlan Qoshanov aıtyp bergen bolatyn.
