Ulytaýda ótetin «Jezkıik» halyqaralyq festıvaline 18 eldiń mýzykanttary keledi
ASTANA. QazAqparat - Birinshi halyqaralyq «Jezkıik» festıvali 12-14 shildede Ulytaýda ótedi. Onda Meksıka, Perý, Polsha, Reseı, Túrkııa, Tájikstan, Frantsııa, Shotlandııa, Japonııa jáne Qazaqstannyń 11 kásibı folklorlyq ujymy óner kórsetedi, dep habarlaıdy Qaraǵandy oblysy ákimdiginiń baspasóz qyzmeti.
Halyq mýzykasynyń festıvali 13-shi shildede Ulytaýdyń bókterinde tabıǵaty ásem Bolatsaı mekeninde ótedi. Bul kúni munda Meksıka, Perý, Polsha, Reseı, Túrkııa, Tájikstan, Frantsııa, Shotlandııa, Japonııa jáne Qazaqstannyń mýzykanttary bas qosady. Qoıylymdar 14.00-de bastalady da, keshke deıin jalǵasady. Bul kúni, sondaı-aq, festıvalge qatysýshylardyń sherýi ótedi. Sońynda «Ulytaý» toby óner kórsetedi.
Folklorlyq ujymdardyń kontsertteri osy aýqymdy shara úshin arnaıy qurylǵan etnoaýylda ótedi. Onyń aýmaǵynda sahna, kıiz úıler, oıyn alańdary, altybaqan, saýda núkteleri, qolóner sheberleriniń shatyrlary, kishigirim ásem músinsheler ornalastyrylady. Etnoaýyldyń kireberisi úlken qaqpalarmen bezendiriledi.
14 shildede festıval Jezqazǵan qalasynda jalǵasady. Qatysýshylar sherýi 15.00-de bastalady, mýzykanttar Jezqazǵan qalasynyń basty kósheleriniń boıymen júredi.
Qoıylymdar Keńgir sý qoımasynyń jaǵajaıynda ótedi. Kórermender úshin folklorlyq ujymdardyń qatysýymen úlken gala-kontsert uıymdastyrylady.
Bul kúni kórermender, sondaı-aq, klassıkalyq mýzyka týyndylaryn tyńdaı alady. Sahnaǵa Qazaqstan, Reseı, Ázerbaıjan, Ózbekstan, Qyrǵyzstan, Armenııa, Moldava, Italııa, Avstrııanyń 17 solısi shyǵyp, óner kórsetedi.
