Ulytaýda qoryqshylardyń órtengen kóliginiń mán-jaıy anyqtalýda
QARAǴANDY. QazAqparat - Qaraǵandy oblysy Ulytaý aýdanynda «Aq bóken» tabıǵı qoryǵynda qoǵamdyq uıymdardan qurylǵan qoryqshy qyzmetiniń erikti-ınspektorlarynyń kóligi órtke orandy, dep habarlady «QazAqparat» HAA tilshisi.
«Búgin tańerteń qoryq aýmaǵynda ınpektorlar jumys barysynda brakonerlermen qaqtyǵysyp qalǵan. Bir ekıpajǵa oq atyldy. Artynsha bir adam kólikten bizdiń mashınaǵa belgisiz zat laqtyrdy. Mashınada birden ot tutandy. Adamdar zardap shekken joq. Kólik tolyqtaı órtenip ketti. Brakonerlerdiń kóliginde nómir bolǵan joq. Tek sur tústi Lend Krýzer, 105-shanaq (kýzov) ekeni belgili», - dep habarlady joba jetekshileriniń biri Marǵulan Seısembaı.
Alaıda ınspektorlardan kólikti belgisiz bireýlerdiń qýdalaǵany, kólikti qasaqana jaǵyp jibergeni týraly shaǵym túsken joq. «Bul fakti ishki ister organdarynda tirkelgen joq. Qazir qoryqqa Ulytaý polıtsııa bóliminiń qyzmetkerleri shyqty. Atys pen órt jaıly málimetti qazirgi kezeńde teriske shyǵaryp, ne rastaı almaımyz. Barlyǵy anyqtalý ústinde. Іs ІІD basshylyǵynyń baqylaýyna alyndy», - dep habarlady ІІD baspasóz qyzmetiniń basshysy Baqytjan Qudııarov.
Qoryqtyń resmı derekterine sáıkes ol jarty jyl buryn qurylǵan. Qaramaǵynda 1 200 000 gektar erekshe qorǵalatyn aýmaq bar. Ol jerlerde balyq aýlaýǵa, ańshylyqpen aınalysýǵa tyıym salynǵan. Aýmaqty qorǵaý úshin qazaqstandyq kompanııalardyń qoldaýymen ÝAZ jáne KamAZ-kýnga kólikteri satyp alynǵan. Sondaı-aq 11 adamnan turatyn ınspektorlar komandasy jasaqtalǵan. Olar ratsııa, GPS, arnaıy formamen jabdyqtalǵan.
