Ulytaýda qandaı ónerkásip oryndary salynady

ASTANA. QazAqparat – Ulytaý oblysynyń ákimi Berik Ábdiǵalıuly ındýstrııalyq-ınnovatsııalyq damytý aıasynda qandaı jańa jobalar iske asatynyn aıtyp berdi, dep habarlaıdy QazAqparat tilshisi.

Aıta keteıik, búgin Úkimette Ulytaý oblysyn qaıta jańǵyrtý jónindegi keshendi jospar tanystyryldy.

«Mıneraldy-shıkizat bazasyn keńeıtý baǵytynda jańa ken ornyn ashý men 10 ken ornynda geologııalyq barlaý jumystaryn júrgizý kózdelgen, bul óz kezeginde 150 jańa jumys ornyn ashýǵa negiz bolady. Óńirdi ındýstrııalyq-ınnovatsııalyq damytý aıasynda jalpy ınvestıtsııa kólemi 700 mlrd teńgeden asatyn, 3 myńnan astam jumys ornyn quryp, 16 jańa jobany iske qosý josparlanǵan», - dedi Berik Ábdiǵalıuly Úkimettiń búgingi otyrysynda.

Atap aıtqanda, ónerkásiptik reagent shyǵaratyn hımııa zaýytyn, qýaty ortasha munaı óńdeý zaýytyn, gıdrometallýrgııalyq óńdeý jolymen qara mys kontsentrattaryn óndiretin zaýytty, quramynda altyny bar kenderdi úımeli shaımalaý jónindegi qaıta óńdeý keshenin jáne Jezqazǵan mys balqytý zaýytynda jańa kúkirt qyshqyly tsehyn salý kózdelip otyr.

«2026 jylǵa qaraı ónerkásip kóleminiń 41%-ǵa, onyń ishinde óńdeý ónerkásibiniń kólemi 35%-ǵa ósýi qamtamasyz etiletin bolady. Negizgi kapıtalǵa salynǵan ınvestıtsııa kólemi 3,7 ese, al ShOB sýbektileriniń ónim shyǵarýy 2,5 ese ósedi», - dedi óńir ákimi.

Buǵan deıin Berik Ábdiǵalıuly óńirdiń sheshilmeı jatqan ózekti máseleleri týraly aıtyp berdi.