«Ulytaý» ulttyq tabıǵı parkiniń shekarasy keńeıedi

ASTANA. QazAqparat – «Ulytaý» ulttyq tabıǵı parkine oblystyń 28 420 gektar jeri qosyldy, dep habarlaıdy QazAqparat tilshisi.

«Ulytaý oblysynyń aýmaǵyndaǵy Ekologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń «Ulytaý» memlekettik ulttyq tabıǵı parki» respýblıkalyq memlekettik mekemesi shekarasynyń aınalasyndaǵy jer ýchaskeleriniń menshik ıeleri men jer paıdalanýshylardan almaı jáne jer sanatyn ózgertpeı, eni eki kılometrden kem emes, jalpy aýdany 28 420 gektar jer kúzet aımaǵy bolyp belgilensin», - delingen Ulytaý oblysynyń ákimi Berik Ábdiǵalıuly qol qoıǵan qaýlyda.

Tıisinshe, qosylǵan jer aýmaǵynda mynadaı áreketterge jol berilmeıdi:

- ulttyq parktiń ekologııalyq júıelerine zııandy áser etetin obektiler ornalastyrýǵa, jobalaýǵa, salýǵa jáne paıdalanýǵa, jańa tehnologııalardy engizýge;

- lastaýshy zattar men sarqyndy sýlardy atmosferaǵa shyǵarý jáne ashyq sý kózderi men relefke tógýge;

- paıdaly qazbalardy barlaý men óndirýge;

- ań aýlaýǵa;

- radıoaktıvti materıaldar men ónerkásiptik qaldyqtardy kómýge;

- ulttyq parktiń ekologııalyq júıeleriniń gıdrologııalyq rejımin ózgertýi múmkin qyzmetke (bógetter, dambalar, gıdrotehnıkalyq qurylystar jáne tabıǵı sý aǵynyn toqtatýǵa nemese azaıtýǵa dýshar etetin basqa da obektiler) salýǵa;

- ulttyq parktiń ekologııalyq júıelerine zııandy áser etýi múmkin basqa da qyzmetke tyıym salynady.

Ákim qaýlysy 1 tamyzdan bastap kúshine enedi.