Ulytaý suhbaty memleket retinde baǵyt-baǵdarymyzdy anyqtaýǵa jeteler tarıhı tolǵanys boldy – N. Orazalınniń Elbasyna haty
ASTANA. QazAqparat - Qazaqstan Jazýshylar odaǵy basqarmasynyń tóraǵasy, senator Nurlan Orazalın Elbasy Nursultan Nazarbaevqa hat joldady. Bul týraly Aqordanyń baspasóz qyzmetinen habarlady.
Avtor óz hatynda Qazaqstan Jazýshylar odaǵynyń jáne respýblıkalyq «Qazaq ádebıeti» gazetiniń 80 jyldyq mereıtoıy joǵary deńgeıde atalyp ótkenin, oǵan alys-jaqyn shetelderden otyzǵa tarta qalamger arnaıy kelgenin jazady.
«Mundaı úlken jıynyń ótýi - eń aldymen, eldegi tynyshtyq pen qoǵamdaǵy túsinistiktiń, barsha halyqty bir muratqa jumyldyryp otyrǵan tuńǵysh Prezıdentimiz - Sizdiń aıryqsha eńbegińiz. Toı tórinen kóringen sheteldik meımandar Qazaqstandaǵy tatýlyqty, birlikti, rýhanı keńistikke, sol sanatta ádebıetke kórsetilip jatqan qamqorlyqty joǵary baǵalady», - delingen hatta.
Ol sondaı-aq Elbasynyń Ulytaý tórinde bergen suhbatyna toqtalyp, qalamgerler qaýymy Jazýshylar odaǵynyń 80 jyldyq mereıtoıyn sol keleli áńgimeniń jalǵasyndaı qabyldaǵanyn aıtady.
«Ulytaý suhbaty búgingi qazaq eliniń taǵdyryn, tilimizdiń, dinimizdiń, jerimizdiń tutastyǵyna qatysty tereńnen tolǵap, ultty uıytar, ózin ózi saqtaýǵa jumyldyrar, memleket retinde baǵyt-baǵdarymyzdy anyqtaýǵa jeteler tarıhı tolǵanys boldy», - dep jazady Qazaqstan Jazýshylar odaǵy basqarmasynyń tóraǵasy.
Sońynda N.Orazalın ult rýhanııatynyń damýyn únemi nazarda ustap kele jatqany úshin Memleket basshysyna alǵysyn bildirgen.
