Ulytaý oqýshylary atqa miný mádenıetin úırenip júr
ULYTAÝ. QazAqparat – Máken Tóregeldın atyndaǵy Jezdi kentiniń taý-ken jáne balqytý isi tarıhy murajaıynyń qyzmetkerleri jergilikti mektep muǵalimderimen birlese otyryp oqýshylarǵa atqa miný mádenıeti boıynsha sabaqtar ótkizip jatyr, dep habarlaıdy QazAqparat tilishisi.
Osyndaı sabaqtardyń birinde № 6 tirek mektebiniń toǵyzynshy jáne onynshy synyp oqýshylaryna jylqyny qalaı durys ertteý kerektigin úıretti.
Balalarǵa jylqy túrleri týraly aıtylyp, at ertteýge arnalǵan jabdyqtar tanystyryldy.
«Bizdiń murajaıda «Murager» jas tarıhshylar klýby jumys isteıdi, onda belsendi oqýshylar aınalysady. Olar jobalyq qyzmetke qatysady. Osy balalarmen jáne eki jergilikti mekteptiń basqa da oqýshylarymen túrli is-sharalar ótkizemiz. «Uly dalanyń jeti qyry» baǵdarlamasy aıasynda №6 tirek mektebiniń oqýshylaryna «Atqa miný mádenıeti» taqyrybynda sabaq óttik. Alǵan teorııalyq bilimin bekitý úshin mektep pedagogy Gúljanat Ablaeva jáne murajaı qyzmetkeri Abzal Qaparovpen birlesip tájirıbelik sabaq uıymdastyrdyq. Bul jumys bizde 2019 jyldan beri júrgizilip keledi», – deıdi ǵylymı-zertteý qyzmetin qamtamasyz etý, ekskýrsııalyq-buqaralyq jáne ekspozıtsııalyq jumys bóliminiń meńgerýshisi Úrzııa Qaparova.
Jezdi kentinde ár otbasy mal, sonyń ishinde jylqy ósiredi.
Sondyqtan mektep oqýshylary erte jastan atqa miný tájirıbesimen tanys. Biraq bári birdeı jylqyny durys ertteı almaıdy.
«Biz olarǵa murajaıda bar eksponattardy, er-toqym, ábzelderdi kórsettik. Olar jylqyny erttep, serýenge daıyndaýǵa kómektesti. Balalarǵa óte qyzyqty boldy. Biz bul tájirıbeni jalǵastyrýǵa nıettimiz», – dep qosty Úrzııa Qaparova.
