Ulytaý oblysynyń tótenshe jaǵdaı departamenti 11 tehnıkamen tolyqty

JEZQAZǴAN. QazAqparat - Ulytaý oblysyna jumys sapary aıasynda Tótenshe jaǵdaılar jónindegi birinshi vıtse-mınıstr Ibragım Kúlshimbaev TJ departamentine túrli maqsattaǵy 11 qutqarý tehnıkasynyń kiltterin saltanatty túrde tabys etti, dep habarlaıdy QazAqparat.

Jańa qutqarý tehnıkasy yqtımal tótenshe jaǵdaılarǵa jedel den qoıýǵa, órtterdi joıýǵa jáne azamattardy qutqarýǵa kómektesedi.

«Respýblıkalyq bıýdjet esebinen 6 órt sóndirý avtotsısternasy satyp alyndy. Sonymen qatar, Ulytaý garnızonyn kúsheıtý úshin Astana qalasy jáne Qaraǵandy oblysy TJD túrli fýnktsıonaldyq maqsattaǵy 5 birlik tehnıkany (avtotsısternalar, jerústi kóligi, avtobýs, avtokran) berdi», - dep jazdy mınıstrlikten.

Halyq dostyǵy men mádenıeti úıinde Ulytaý oblysynyń Tótenshe jaǵdaılar departamenti úshin Týdy saltanatty túrde tapsyrý jáne TJD ofıtserler quramyna ataqtar tapsyrý rásimi ótti.