Ulytaý oblysynyń halqy 130-dan astam saılaý ýchaskesinde daýys berip jatyr

ULYTAÝ. QazAqparat – Ulytaý oblysynyń turǵyndary kezekten tys prezıdent saılaýyna belsendi qatysyp jatyr. Óńirde daýys berýshilerdi jalpy 136 saılaý ýchaskesi qabyldaýda. Saǵat 18.00-ge deıin elektorattyń 74 %-dan astamy óz tańdaýyn jasap úlgergen, dep habarlaıdy QazAqparat tilshisi.

Ulytaý oblysynda eki aýdan men 3 qalada 227 myń adam turady. Onyń 140 myńy saılaýǵa qatysýǵa quqyly.

Tizimge tirkelgen daýys berýshilerdiń eń kóbi Jezqazǵan qalasyna tıesili. Bir ǵana 235-shi saılaý ýchaskesinde daýys berýge quqyly 2300-ge jýyq adam tirkelgen.

«235 saılaý ýchaskesine halyq óte belsendi kelip jatyr. Eldiń kóńil kúıi jaqsy. Biz bul jerde eshqandaı ereje buzylmaýyn baqylyp otyrmyz. Eshqandaı fors-major bolǵan joq», - deıdi №235 saılaý ýchaskesiniń baıqaýshysy Júrsin Jaqııa.

Ásirese, jastar belsendilik tanytyp jatyr.

Sonymen qatar jańa oblysta múmkindigi shekteýli jandar da azamattyq boryshyn oryndaýǵa asyǵýda.

Olar úshin óńirdiń saılaý ýchaskelerinde qajetti jaǵdaı jasalǵan. Ulytaý oblysynda 500-ge jýyq múgedekter bar

.

Olardyń júrip-turýyn jeńildetý úshin 4 ınvotaksı qarastyrylǵan.

Sonymen qatar, aýrýhanada em alyp jatqan naýqastar, qarttar úıiniń turǵyndary men tergeý ızolıatorynda otyrǵandar da azamattyq ustanymyn bildirýge múmkindik aldy.

Olarǵa arnaıy kóshpeli daýys berý jáshigi jetkizildi.

«Bul saılaý elimizdiń bolashaǵy úshin, bala-shaǵamyzdyń bolashaǵy úshin óte mańyzdy bolǵandyqtan, osy saılaý ýchaskesinde daýys berip jatyrmyz. Bul mereke jaqsy jaǵynan kórinip jatyr. Bári qoldarynan kelgenshe shyn kóńilderimen daýystaryn berip, kóńil kóterip, bılep,daýys berýde», - dedi Ulytaý oblysynyń arnaýly áleýmettik qyzmetter kórsetý ortalyǵynyń turǵyny Murat Aldajarov.

Aýmaqtyq jáne ýchaskelik saılaý komıssııalarynda 1000-ǵa jýyq adam jumys istep jatyr.

Al, turǵylyqty tirkeýi joq azamattar oblys boıynsha 5 saılaý ýchaskesinde ýaqytsha tirkeýge turyp, daýys berdi. Bul kúni turǵyndar qoǵamdyq kólikte tegin qatynady.