Ulytaý oblysyndaǵy medıtsınalyq kadr tapshylyǵyn tómendetý úshin jol kartasy ázirlenýde

ASTANA. QazAqparat – Ulytaý oblysyndaǵy medıtsınalyq kadr tapshylyǵyn tómendetý úshin jol kartasy ázirlenýde. Bul traly Premer-Mınıstrdiń orynbasary – Eńbek jáne halyqty áleýmettik qorǵaý mınıstri Tamara Dúısenovanyń jaýabynda aıtylǵan, dep habarlaıdy QazAqparat tilshisi.

«Densaýlyq saqtaý mınıstrligi 2023-2024 jyldarǵa arnalǵan memlekettik bilim berý tapsyrysyn ornalastyrý kezinde óńirde (Ulytaý oblysy) suranysqa ıe kadrlardy daıarlaýǵa 38 oryn bóldi. Densaýlyq saqtaý mınıstrliginiń medıtsınalyq bilim jáne ǵylym uıymdarynda memlekettik bilim berý tapsyrysy negizinde bilim alǵan jas mamandardy, fılosofııa doktorlaryn (PhD) derbes bólý jónindegi komıssııanyń 2023 jylǵy 30 maýsymdaǵy sheshimimen óńirge klınıkalyq beıindegi 3339 túlektiń 26-sy bólindi», - delingen Tamara Dúısenovanyń Májilis depýtattary saýalyna bergen jaýabynda.

Onyń dereginshe, medıtsınalyq kadrlardyń tapshylyǵyn tómendetý maqsatynda Densaýlyq saqtaý mınıstrligi Ulytaý oblystyq densaýlyq saqtaý basqarmasymen birlesip ,jergilikti bıýdjet qarajaty esebinen qarjylandyrý arqyly tıisti jol kartasyn ázirlep jatyr.

«Jol kartasyna 2023-2025 jyldar bólinisinde óńirge suranysqa ıe klınıkalyq beıindegi mamandardy daıarlaý jónindegi is-sharalar engiziletin bolady. Qazirgi ýaqytta jergilikti bıýdjet qarajaty esebinen 2023 jyly 16 maman daıarlaýǵa qarajat bólindi», - dedi mınıstr.