Ulytaý oblysynda zańsyz altyn qazǵan qylmystyq top ustaldy

ULYTAÝ. QazAqparat – Ulytaý oblysy PD uıymdasqan qylmysqa qarsy kúres basqarmasynyń qyzmetkerleri zańsyz jolmen altyn óndirýmen aınalysqan 7 adamnan quralǵan qylmystyq topty ustady, dep habarlaıdy QazAqparat tilshisi.

Oqıǵa ornynan ekskavator, sý sorýǵa arnalǵan qubyrlar men shlangtar, janarmaı bóshkesi jáne quramynda altyn bar 83 qap ken tárkilendi.

Odan ári izdestirý sharalary kezinde polıtseıler taǵy eki kúdiktini, atalmysh «óndiristiń» uıymdastyrýshysy - 23 jáne 34 jastaǵy er adamdardy ustady.

Olar jol talǵamaıtyn eki kólikpen júrip bara jatqan jerinen ustaldy.

«Birinshi avtokólikti tekserý barysynda bes patrony bar jaýyngerlik tapansha tabylyp, tárkilendi. Ekinshi kólikte polıtseıler úsh patrony bar travmatıkalyq tapanshany tapty. QR QK - niń 334-baby «Jer qoınaýyn óz betinshe paıdalaný» jáne QR QK-niń 287-baby «Qarýdy, oq-dárilerdi, jarylǵysh zattar men jarylǵysh qurylǵylardy zańsyz satyp alý, berý, ótkizý, saqtaý, tasymaldaý nemese alyp júrý» boıynsha sotqa deıingi tergeý júrip jatyr», - dep habarlady Ulytaý oblysy PD baspasóz qyzmeti.