Ulytaý oblysynda sıyr basy nelikten azaıǵany belgili boldy

ASTANA. QazAqparat – Ulytaý oblysynyń ákimi Berik Ábdiǵalıuly ortalyq kommýnıkatsııalar qyzmetiniń kóshpeli brıfıngisinde óńirde sıyr basy nelikten azaıyp, jylqy sany óskenin túsindirdi, dep habarlaıdy QazAqparat tilshisi.

«Qazir óńirde aýyl sharýashylyǵyn damytý jumystary júrip jatyr. Bul saladaǵy negizgi baǵyt – et óndirý. Mysaly, ókinishke qaraı, iri qara sany 4,8 paıyz nemese 222 myńnan 211 myń basqa azaıyp jatyr. Biraq jylqynyń sany kóbeıip keledi. Buryn 197 myń bolsa, 220 myńǵa artty. Halyqtyń kóbi qoı men sıyr baǵatyn jumys kúshi joq bolǵandyqtan jylqyǵa kóship jatyr. Sondyqtan qazir nesıelerdi iri qara men qoı basyn kóbeıtýge, et óńdeýge baǵyttap otyrmyz», - dedi ákim.

Onyń sózine qaraǵanda, óńirde baǵany turaqtandyrý qory jumys isteıdi.

«Oǵan Úkimetten arnaıy 1 mlrd teńgege jýyq qarajat bólindi. 994 tonna ónimge ınterventsııa júrgizildi. Ótkende saýda jáne ıntegratsııa mınıstrliginiń mamandary kelip áleýmettik kásipkerlik korporatsııanyń jumysyndaǵy biraz qatelikti kórsetip ketti. Ol bir jaǵynan tájirıbeniń azdyǵyna baılanysty. Anyqtalǵan kemshilikterdi túzeý jumystary júrip jatyr», - dedi Berik Ábdiǵalıuly.