Ulytaý oblysynda salynatyn medıtsınalyq nysandarǵa bir aptada jer ýchaskesi bólinýi tıis - Premer

ASTANA. QazAqparat – «Aýyldyq densaýlyq saqtaýdy jańǵyrtý» ulttyq jobasy aıasynda óńirlerde 655 alǵashqy medıtsınalyq-sanıtarlyq kómek nysanyn salý kózdelip otyr. Bul týraly Premer-Mınıstr Álıhan Smaıylovtyń tóraǵalyǵymen ótken Prezıdent Q. Toqaevtyń saılaýaldy baǵdarlamasyn iske asyrý jónindegi respýblıkalyq shtabtyń otyrysynda aıtyldy, dep habarlaıdy QazAqparat Úkimettiń resmı saıtyna silteme jasap.

Densaýlyq saqtaý mınıstri Ajar Ǵınııat ótken jyldyń qarasha aıynda aýyldaǵy medıtsınalyq kómektiń sapasyn arttyrý maqsatynda «Aýyldyq densaýlyq saqtaýdy jańǵyrtý» ulttyq jobasy bekitilgenin baıandady. Onyń aıasynda óńirlerde 655 alǵashqy medıtsınalyq-sanıtarlyq kómek nysanyn, onyń ishinde 253 medıtsınalyq pýnkt, 242 feldsherlik-akýsherlik pýnkt jáne 160 dárigerlik ambýlatorııa salý kózdelip otyr.

Budan basqa 32 kópbeıindi ortalyq aýdandyq aýrýhanany (2024 jyly – 7, 2025 jyly – 25) jańartý josparlanǵan. Onda ınsýlt ortalyqtary, kardıologııa, jan saqtaý jáne ońaltý bólimsheleri ashylyp, olar KT, MRT, ÝDZ, ÓJJ apparattarymen jaraqtandyrylmaq. Sonymen qatar, aýyldyq densaýlyq saqtaý obektileri úshin 1 100 medıtsına qyzmetkerin daıarlanady.

Júrgizilip jatqan jumystar týraly Abaı oblysynyń ákimi Nurlan Uranhaev, Qaraǵandy oblysynyń ákimi Ermaǵanbet Bólekpaev jáne Ulytaý oblysy ákiminiń orynbasary Ulantaı Úsenov baıandama jasady.

Premer-Mınıstr bıyl qurylysy bastalatyn medıtsınalyq nysandardyń barlyǵyna derlik jer bólingenin atap ótti. Tek, Ulytaý oblysynda ǵana atalǵan jumystar jalǵasyp jatyr.

«Ákimdik jer ýchaskesin bólý jumystaryn bir apta ishinde aıaqtaýy tıis», - dedi Álıhan Smaıylov.

Sonymen qatar, Úkimet basshysy 1 sáýirge qaraı alǵashqy kómek kórsetý obektilerin salý boıynsha jobalaý-smetalyq qujattamany ázirleýdi aıaqtaý, 1 mamyrǵa deıin kópbeıindi aýdandyq aýrýhanalardy kúrdeli jóndeý jáne qaıta jańartý úshin qujattamany ázirleý qajettigin aıtty. Qurylys maýsymy bastalǵannan keıin barlyq óńir jobalardy iske asyrýǵa kirisýi kerek.

Oǵan qosa, Premer-Mınıstr josparlanǵan sharalardy ýaqtyly iske asyrý úshin qurylys ýchaskelerine deıin ınjenerlik kommýnıkatsııalar men joldardy jedel júrgizý, merdigerlermen sharttar jasasý kerektigin aıtty.

Álıhan Smaıylovtyń aıtýynsha, jańa medıtsınalyq nysandardy kadrlarmen qamtamasyz etýdi aldyn ala qarastyryp, olarǵa áleýmettik qoldaý sharalarynyń tolyq paketin usyný qajet.

«Taǵy da atap ótemin, Ulttyq jobany iske asyrýdyń árbir kezeńin jobalyq basqarý júıesi sheńberinde turaqty baqylaýǵa alamyz», - dedi Úkimet basshysy.